Gazteria arloak 5 eta 14 urte bitartekoentzat uztailean proposatzen dituen jarduera hauetarako izena emateko azken eguna martxoaren 29a izango da, eta udalak aurreratu duenez, «haur bat ere plazarik gabe geratu ez dadin» ahaleginduko dira.
Azken urteetan plaza kopuruekin eman izan diren arazoen ondoren, aurten izena emango duten haur guztiei aukera eskaintzeko lanetan ari direla jakinarazi du Lupe Queiruga Gazteriako zinegotziak. «Badakigu aurreko urteetan Hondarribiko zenbait haur programetatik kanpo geratu zirela, eta iaz indarrean zegoen kontratua zabaldu genuen Uda Jolas programan eskaera guztiak sartu ahal izateko», gogoratu du zinegotziak. Izan ere, hasierako kontratuan plaza kopurua 220 haurrentzakoa bazen ere, 246 eskaera jaso zituen udalak, eta azkenik denek parte hartu ahal izan zuten. Haatik, Uda Abentura programaren kasuan, 100 plazatik 120ra zabaldu zuten eskaintza.
Queirugak argitu duenez, Uda Jolas eta Udabentura udako programaren zerbitzua 2023an esleitu zen kontratu baten bidez enpresa batek eskaintzen du, eta 3 urterako kontratua da. Hala ere, udalak kontratu horren baldintzetan zehazten denari jarraiki, «benetako premiak hasieran aurreikusitakoak baino handiagoak izanez gero, kontratua aldatzea eskatu ahal izan du, kontratuaren prezioaren %20ra http://app.hondarribia.eusarte gehienez». Hortaz, aurten sisteman aldaketak egin dituzte, eta zinegotziak aurreratu duenez, izena emateko epea itxi eta eskaera zein den argitu ondoren hartuko dituzte erabakiak. Hala ere, udalaren asmoa da «inor kanpoan ez uztea».
Harrera familietako haur sahararrak ere
Are gehiago, Irunen ez bezala, Hondarribiko Udalak antolatzen dituen udaleku ireki hauetan, elkartasun harrera programaren baten ondorioz Hondarribian uda pasako duten kanpoko haurrei ere leku egingo die. «Iaz horrela jokatu genuen, eta aurtengoan ere Tadamum elkartearekin harremanetan jarri gara jakinarazteko Oporrak Bakean programan parte hartzen duten haur sahararrek aukera izango dutela herriko beste edozein haurrek bezala», azpimarratu du Lupe Queirugak.
Alde horretatik, iaz 9 haur saharar izan ziren Hondarribiko harrera familiekin uda pasatzen, eta denei eman zitzaien udalekuetan izena emateko aukera. Aurtengoan ere hala izango da, eta Oporrak Bakean programarekin bezala, Txernobilgo Lagunak elkartearekin haur ukrainarrik egongo balitz ere, berdin onartuko luketela argitu dute.
Udalekuen eskaintza
Uda Jolas udaleku irekien formatua eskainiko du uztailaren 1etik 30era bitartean. Eta Uda Abenturaren kasuan, bi txanda izango dira, uztailaren 2tik 15era bata, eta 16tik 30era bestea. Joan den urtean Uda Jolas eta Uda Abentura programetako taldeak handitu ziren heinean, jarduera berriak ere proposatu zituzten. Eta aurtengoan ere ildo beretik jarraituko dute. Udaletik aurreratu dutenez, Labenneko aqua parkera irteerak, kayak irteera edo rafting egiteko aukera emango dute Uda Abenturan.
Aurreinskripzioak online egingo dira martxoaren 22tik 29ra, http://app.hondarribia.eus helbidean, edo aurrez aurre Gazteen Zerbitzuan (Javier Ugarte kalea 6, behea), astelehenetik ostiralera, 16:30etik 19:30era, eta larunbatetan 10:00etatik 13:00etara.