Irungo Elkarrekin Podemos taldeak ere gogor salatu du azken egunotan, Bidasoa ospitaleko haurrentzako psikiatria zerbitzua ezabatu izana. David Nuño talde honetako bozeramaileak salatu duenez, «erabaki honek erakusten du PSEk eta EAJk ez dutela eskualdean osasungintzan inbertitzeko asmorik, eta gure familien eskubideak kolokan jartzen dituztela behin eta berriz».
Zentzu honetan, psikiatria zerbitzua Donostiara bideratu dute oraingoan, eta 2020ko pandemiaz geroztik gazteen osasun mentalari lotutako kontsultak nabarmen gora egin badute ere, Bidasoa ospitalean halako zerbitzuak ezinbestekoak direla azpimarratu du bere partetik Osasun Bidasoa plataformak. Hain justu, soilik elikadura nahasmenduengatik Osakidetzak jasotako kontsulta kopuruak 2021ean %62,8 emendatu baziren, 2022an %72,6ra igo ziren. Horri gehitu behar zaizkio psikiatriari lotutako bestelako koadro eta diagnostikoak.
Psikologoak ikastetxeetan
Gogoan hartu beharra dago, alde horretatik, osasun zentroetan ez ezik, Europar Batasunaren irizpideen arabera, ikastetxeetan ere arreta psikologikoa eskaintzeko irizpidea aintzat hartuta, eskualdeko hezkuntza zentro handienek psikologo baten beharraz ohartarazi diotela Eusko Jaurlaritzari eta Irungo Udalari. Eta estatuko zenbait autonomi erkidegoetan (Herri Katalanetan adibidez) DBHko ikastetxeetan halako figurak lanean jarri dituzten bitartean, Eusko Jaurlaritzak ez du hau bermatzeko asmorik agertu, eta hezkuntza zentroak ikasturte hasieratik daramate agintarien erantzun baten zain.