Udalak argitu duenez, bihotzekoak eman ondoren 30.000 lagun hiltzen dira espainiar estatu mailan urtero, ospitalez kanpo gertatzen diren heriotzen artean, kopururik handiena suposatzen du. Alde horretatik, desfibriladoreak bizitzak salbatzeko giltzarri dira, halako gailu bat erabiltzen hasi gabe igarotzen den minutu bakoitzeko, bizirauteko aukerak %10 murrizten baitira. Bihotza gelditu eta minutu batera, biktimak %90eko bizirik irauteko tasa duen bitartean, 9 minutura %10era murrizten da. Aldiz, larrialdi zerbitzuetako anbulantziak gure eskualdean abisua jaso eta 10-12 minututan iritsi ohi dira artatzera batez bestean.
Herriko desfibriladoreen diagnostikoa
Hau kontuan hartuta, herrian zenbait desfibriladore berri instalatu ditu Hondarribiko Udalak, baita dagoeneko martxan zeuden batzuk birkokatu ere. Lupe Queiruga, Osasun gaiez arduratzen den udal ordezkariak argitu digunez, hirian dauden desfibriladoreen diagnostiko bat egin dute beharrak zeintzuk diren ikusteko.
«Eraikin publikoetan ez ezik, zerbitzu pribatuetan zeudenak ere kontuan hartu ditugu, eta 25 identifikatu dira herrian, eta beraiek proposatu dutena izan da leku publikoetan zeuden bi, eraikinaren kanpoaldera ateratzea, 24 orduz erabili ahal izateko». Horren arabera, udaletxean zegoena eta Arraun Elkartekoa dagoeneko fatxadan kokatu dituzte. Era berean, herrian zeuden hainbat gailu berrantolatu dituzte. «Portuan adibidez, 200 metroko eremu batean bat baino gehiago zegoen bitartean, herriko beste leku batzuetan gabezia bat zegoela ikusi dugu», azaldu digu zinegotziak. Hortaz, azkenik, Zuloaga Etxean zegoena Txiplaura eramango dute, Musika Eskolan zegoena Sokoara, eta bost desfibriladore berri instalatuko dituzte; Mendelu auzoan, hondartza eremuan, Kai Berrian, Guadalupen eta Portua auzoan ere.
Boluntarioen sarea
Baina behin 30 gailuak modu egokian eta eskura instalatuak egongo direnean, hauek behar bezala erabiltzeko, eta ahal den neurrian bizitzak salbatzeko aukerak emendatzea da proiektuaren helburua. Hartara, herri mailako Erreskatatzaile Sarea sortu nahi dute herrian. 100 boluntario behar dituzte horretarako. Queirugak argitu duenez, «udalaren helburua da gizartea aktibatzea eta ikuspegi komunitario batetik saretzen jarraitzea».
Horretarako, 3 orduko ikastaroak emango dituzte apirilaren 1etik 16ra (1, 4, 7, 8, 9, 10, 11, 14, 15 eta 16an) Alde Zaharreko Kultur Etxean, eta egun bakoitzeko izena emango dutenen arabera egokituko dituzte, goizez 9:00etatik 12:00tara edo arratsaldez 17:00etatik 20:00tara. Hau ezinbesteko urratsa izango da proiektua aurrera eramateko. Izan ere, «desfibriladoreak hor daude eskuragai baina formakuntzarik gabe normala da jendeak beldur edukitzea, baina jendea aktibatu nahi dugu». Eta badirudi lortu egin dutela. Joan den larunbatean aktibatu zuten izena emateko aukera www.hondarribia.eus atarian, eta dagoeneko 79 lagunek aurkeztu dute haien burua boluntario izateko. «Erreskatatzaile taldea gero saretua egongo da aplikazio baten bitartez, izan ere, larrialdi baten aurrean norbaitek desfibriladorea erabiltzeko keinua egingo duen mementoa, boluntarioren bat hurbil baldin badago, abisua jasoko du aplikazioan».