“Galera bat bizi dugunean, oso ohituak gaude sufrimendua nork bere baitan eramaten, ez partekatzen”: Oihane Garamendi psikologoak egunerokoan ikusten dituen egoeren azalpena hala hasi du. Eusko Jaurlaritzak 2020an sortutako Betirako zerbitzuko langilea da, herritarrei dolu prozesuetan arreta eta laguntza psikologikoa emateko baliabidea. EAEko hainbat herritan ari dira lanean, eta asteazken honetan Hondarribia batu zaie zerrendara.
Josu Peña gizarte kohesiorako hautetsiak azaldu duenez, 2023an Gizarte Kohesioko batzordea sortu zutenean “erronka gisa” hartu zuten legez udaletxe batek eskaini beharreko gizarte zerbitzu guztiak eskaintzea, baita ahal balitz gehiago ere. Ildo horretatik abiatu dute azken asteotan bakardadearen prebentziorako programa bertzeak bertze. Doluaren laguntza haatik ez da udalek berariaz eskaini beharreko zerbitzua, baina Azpeitian ematen zutela ikusirik, ageriko beharra dela iritzi zuen Peñak. Hala, zerbitzua eskaintzeko aukerak zein ziren aztertu, eta Betirakorekin harremana egin zuten. Gaur, martxoaren 26an hartu ditu lehen herritarrak Kasinoan.
“Sufrimendua kanpora ateratzea beharrezkoa da, eta profesional batekin hobe”
Adin guztietako hondarribiarrek eskatu dezakete hitzordua Udalaren webgunean, eta ondoren psikologo bat haiekin harremanean jarriko da lehen hitzordu bat finkatzeko. Oihane Garamendik azaldu duenez, lehen saioan herritarrak dituen beharrak neurtuko dituzte, eta horren arabera nolako psikoterapia beharko den erabakiko dute, elkarrekin. Batzuetan, sesio gutxi batzuekin aski dela azaldu du, “sentitzen den mina normala, zilegia dela” ulertzea baita dolua prozesatzen hasteko lehen urratsa. Hala, norberak bere inguruan dituen baliabideak laguntza profesionalarekin uztartzea da usu psikologoek egiten duten lanaren funtsa.
Buruz-buruko saioak taldeko terapia saioekin uztartzean emaitza hobeak behatzen dituztela azaldu du Garamendik. Hala, bide hori hartzeko prest direnekin taldeko saioak ere antolatuko dituzte, betiere “inor ezertara behartu gabe”. Pertsonen dolu prozesuan psikologoek duten papera makulu batenarekin alderatu du: “egoera txarrean dagoenean laguntzeko gaude gu, baina pertsonak urratsak egin eta denborarekin makulua pixkanaka erretiratzen joan behar da”.
Asteazken arratsaldero, 13:00etatik 17:30era egonen dira Betirako zerbitzuko terapeutak Kasino Zaharreko lehen solairuan. Hondarribian erroldatuta eta dolu prozesuan den herritar orok eskatu dezake hitzordua, sarean, edo BAZen.