Guadalupeko santutegira joateko Errandeneatik ezkerreko bidea hartu eta Kalbariotik igotzeko ohitura handia dago Hondarribian. Baina azken urteetan bidearen egoerak kaskarrera egin du nabarmen, eta bertan zeuden elementuak hondatu egin dira. Hondarribiko Udalak aditzera eman duenez, zenbait lekutan euriak higadura sakonak eragin ditu, eta honek oinezkoen pasabidea asko zailtzen du. Egoera hau zuzentzeko Kalbarioko igoera egokitzeko lanak hasi zituzten atzo eta, eguraldia lagun bada, lauzpabost asteko epean amaituko dituzte, maiatzaren hasierarako.
Gogoan hartu behar baita, garai honetan kristau fededunek ostiraletan “Via Crucis”a egin ohi dutela, eta obrek hainbat eragozpen sor ditzaketela gogoan hartu du udalak. Horregatik, obra garaian, zatia guztiz itxi beharrean, pasabidea oinezkoentzat ahalbidetuko dute. Hala ere, obrak garai honetan egitea lehenetsi dute, uda garaia eta irailaren hasieran ibilbidea egonkortuta egon dadin.
Argitu dutenez, oinezkoen pasabidea bermatzeko, lanak hartuko dituen zatia hesituta egongo da, eta izkina batean pasabide bat utziko dute, ezinbestean erabili behar izatekotan, bertatik pasa ahal izateko adinako zabalerarekin. Txirrindek aldiz ezingo dute obrak irauten duen bitartean bertatik pasa.