Muara tabernaren berrirekiera: kultura eta aktibazio soziala helburu
Hondarribiko Muara taberna berriz irekiko da larunbat honetan, espazioari erabilera berria emateko eta elkartearen junta aldaketa aurkezteko. Ekhiñe Alza elkarteko kideak azaldu duenez, Muara gune bizia bihurtu nahi dute, hilabetean behin ekintza kulturalak antolatuz eta komunitateari parte hartzeko aukera eskainiz.
Irekiera-ekitaldia larunbatean izango da, arratsaldeko 18:00etatik aurrera. Bertaratzen direnek pintxoak eta edariak izango dituzte eskuragarri, eta giroa berotzeko futbolin txapelketa, mahai jolasak eta DJ saioa antolatu dituzte. Muara elkartetik jendearen proposamenak jasotzeko prest daudela azpimarratu dute, eta bereziki gazteak espazioa ezagutzera animatu nahi dituzte.
Tabernaren berrirekierarekin, ezker abertzalearen lokala aktibatzeko urrats bat eman nahi dute, kultur ekitaldien eta parte-hartze sozialaren bidez herritarren topagune bihurtuz. Muara tabernaren etorkizuneko dinamika komunitatearen ekarpenei eta parte-hartzeari esker moldatuko dela nabarmendu dute.