Arraunkadaz beteriko asteburua izanen da Hondarribian, bihar eta etzi estropadak izanen baitira. Bihar, 17:25ean hasiko da Euskotren ligan, emakumeetan XVII. Txingudiko bandera. Ondoren, 18:20tan, Eusko Label ligan, gizonetan, Hondarribiko XXXVIII. Bandera lortzeko lehiatuko dira.
Igandean berriz, gizonezkoen bigarren mailan, ARC 1 ligan Hondarribiko Arrantzaleen kofradiako XIX. Bandera izanen da, goizeko 11:00etan.
Urteroko hitzordu eder eta garrantzitsua izateaz gain, herria saretzen eta harrobia sortzen duen momentua da Igor Enparan alkatearentzat. Haren hitzetan, herrian maila profesionalean ari diren hiru trainera izateak kirol zaletasuna eta ohitura sustatzen du.
Estropadek herria girotu dezaten, Arraun Festa izanen da larunbatean, eta igandean Herri Giroa. Egun osoan zehar, txarangak izanen dira Hondarribian zehar, larunbatean adibidez, 16:30ean kalejira abiatuko da San Pedro kaletik portura, estropadara batera joateko.