Uztaileko Udal Osoko Bilkuran onartu zuten behin betiko, joan den 2024ko ekainean Abotsanitzek eta EH Bilduk aurkeztu eta haien bozkarekin onartutako mozioa. Urtebeteko prozedura administratiboaren urrats guztiak egin eta herritarren alegazioak aintzat hartuta, bereziki Alde Zaharra eta Portua auzoetan turismoaren «masifikazioak» eragiten dituen «bizikidetza arazoak» arinduko dituelakoan dago Hondarribiko Udala.
Bisita gidatuetan parte hartzen duten turistek Alde Zaharra eta Portua auzoetan herritarren egunerokoa sobera oztopa ez dezaten, erregulatu beharra ikusten zuen udal gobernuak. Urtero 170.000 bisitari inguru jasotzen dituen herria izanik, Hondarribia herri turistikoa denik ezin ukatu daiteke, eta udal gobernuak araua aldatzeko argudiatu duenez, «garai bateko agintariek bilatutako hiri-ereduak gainezka egin du herrian, hondarribiarren eta turisten arteko bizikidetzan eragiteraino».
Azken urteetan Alde Zaharra eta Portua auzoetan 40tik gorako talde turistiko antolatuak bildu ohi izan dira, eta «masa turistiko horren ondorioz» kaleetatik ezin pasa eta norbere etxeko atarira ezin sartu ibili diren hondarribiarren kexuak jaso ditu udalak. Horrenbestez, herritarrek aurkeztutako alegazioak kontuan hartuta, hasierako dokumentuarekin alderatuta, zenbait aldaketa eginda sartu da indarrean arau berria.
Arau berriaren aldaketa nagusiak
Udal ordenantza berriak agintzen duenez, aste santu eta uda garaian bisitak gaueko 22:00ak arte luzatu ahalko dira, hasieran urte osoan zehar ordutegi muga 19:00ak izatea aurreikusia zegoen bitartean. Eta gehienez ere 28 laguneko taldeak baimenduko dituzte, hasierako asmoa 25etara mugatzea zenean. Dena den, Arma Plaza Fundazioak antolatzen dituen bisita gidatuetan, eskolartekoen bisita gidatuetan, eta Eusko Jaurlaritzaren ondare kulturalerako baimena daukaten gidek zuzendutakoetan salbuespenak onartuko dituzte.
Bestalde, espazio publikoaren okupazioaren ikuspegitik, udal ordenantzak etxebizitzak dauden guneetan bisitari taldeak eraikinen fatxadetatik gutxienez bi metroko distantzia errespetatzeko beharra zehazten zuen oinezkoen pasabidea bermatzeko. Baina azkenik, honakoa betetzerik ez dagoen guneetan «gizalegez» jokatzeko ñabardura zehazten du udal ordenantzak.
Era berean, turista talde hauek utzi eta hartzeko autobusei hiru gune baimenduko zaizkie. Hasieran aurreikusitak zeuden San Juan de Dios biribilgunea eta Sabino Aranako geltokiaz gain, hondartzako eremuari zerbitzu emateko Foru kalean ere egin ahal izango dituzte geldialdiak.