Hondarribiko Gizarte Kohesiorako arloak «herritar guztiek berdintasunez jaiak gozatu» ahal izateko hartu zuen mugikortasun urritua duten pertsonentzako eremuak erreserbatzeko erabakia aurreneko aldiz 2023 urtean. Josu Peña arloko ordezkariak azaltzen duenez, urte hartan mugikortasun urritua zuen pertsona batek jo zuen udalera halako neurri baten eske, eta aukera guztiak aztertu ondoren, azken bi urteetan eremu hauek erabiliak eta ondo baloratuak izan dira herritarren partetik.
Horiek hala, aurtengoan ere, irailaren 6an Kantineren aurkezpenean, mugikortasun urritua duten pertsonek aparteko gune bat izango dute Gipuzkoa plazan. Irailaren 7an, aldiz, udal ordezkariek Arma Plazan dantzatu ohi duten Aurreskuan ere. Eta irailaren 8an, Alardea jarraitu ahal izateko Kale Nagusian (Bretxan) eta Damarri plazan egokituko dituzte goiz eta arratsaldez, eta Martxoak 8 plazatxoan arratsaldeko desfilea jarraitzeko ere.
Udalak argitzen duenez, mugitzeko zailtasunak dituzten pertsonek edota aulki-gurpildunekin bertaratu eta gunetik erraz ateratzeko bideak bermatzen dituzten guneak dira hauek. Era berean, irailaren 6tik 11ra bitartean Bentako eszenatokian ere gune bat egokituko da kontzertuak jarraitu ahal izateko, eta irizpide berbera jarraituz, eremua sarrera-irteerak errazteko helburuarekin pentsatua dago.
Oroitarazi duenez, mugikortasun urritua duten pertsonei erreserbatutako guneak dira, eta erabiltzeko asmoa duten herritarrek lekua erreserbatu edo eskatu beharko dute hemen, aldez aurretik.