Palestinarekiko elkartasuna oso presente izango da aurten Hondarribiko Alarde egunean. Jaizkibel konpainiak ohiko zapiaz gain, kufija palestinar zapia eramateko deia luzatu die konpainiako kideei aurten. Horretarako, kufijen salmenta kanpaina abuztu hasieran abiatu zuten Gernika-Palestina eta Etxara elkarteekin lankidetzan. Argitu dutenez, Zisjordaniako enpresa baten bidez eskuratu dituzte zapiak, eta hilaren 8an egingo nahi duten elkartasun keinu sinbolikoaz haratago, hauen salmentari esker bildutako dirua Gazara bideratuko dute.
Jaizkibel konpainiak jakinarazi du kafijak agortu egin zaizkiela, eta elkartasun kanpainak jasotako harrera beroa eskertu nahi izan du. Hala ere, azken entsegu egunerako eta Alarde egunerako zapi gehiago lortu ahal izango dituztela seguru dago konpainia parekidea, eta eskuragarri jarri ahal izango dituztela. Dena dela, mementoz, beste bideetatik palestinar zapi tradizionala lortzera animatzen dute, eta Palestina laguntzeko beste bideak arakatzera. Aurretik eskaria egin dutenek mezu elektroniko bat jaso dutela oroitarazi dute, eta zapia eskuratzeko ordainketaren ziurtagiria aurkeztu beharko dutela hau jasotzeko. Zalantzarik izanez gero jaizkibelkonpainia@gmail.com posta elektronikora idazteko gomendatu dute.
Iragarri dutenez, entseguen aurretik egingo dute banaketa. Hiru izango dira egingo dituzten entseguak. Irailaren 2an 20:00etan Olagarro elkartetik abiatuta. Eta irailaren 4an eta 5ean Bitoriano Juaristi kaletik hasita, ordu berean, 20:00etan.