Hiriko Urrezko Intsignia emateko Hondarribiko Udalak 2023an aurreneko aldiz antolatutako prozesu parte-hartzailea errotzen doala dirudi. Urterik urtera proposamen fasean zein bozkatzerakoan ere, herritar gehiago animatzen ari dira herrikide edo kolektiboren baten alde bozkatzera. Aurreko bi edizioetan 1.022 eta 775 bozka jaso ondoren, aurten 1.876 lagunek bozka eman dute.
Aurtengo prozesuaren lehen fasean, hondarribiarrek euren proposamenak aurkeztu ahal izan zituzten. Ondoren, Udaleko Bozeramaileen Batzordeak proposamen horiek aztertu zituen, eta hiru hautagaitza hautatu zituen: Alberto Lasa Ansalas, Sorotan Bele musika taldea eta Maria Jesus Berrotaran Etxeberria.
Orotara 1.876 bozka bildu dira aurten, eta parte hartze handia nabarmendu du udalak. Horietatik, 1.106 bozkarekin Alberto Lasa Ansalas izan da hautatua. Sorotan Belek 413 boto eta Maria Jesus Berrotaranek 354 boto jaso dituzten bitartean.
Iaz, Gloria Gonzalez-Aseginolaza biologo eta eritasun arraroen eta terapia genikoaren goi mailako ikertzaile hondarribiarrak jaso zuen aitortza, 462 botorekin. Done Pedro Itsasgizonen Kofradiari (162 boto) eta Hondarribiko Ikastolaren sortzaileei (150 boto) eman zieten herritarrek. Eta Urrezko Intsignia herritarren bozka bidez erabaki zen aurreneko urtean, aldiz, guztira 1.022 pertsonek eman zuten bozka, hiru finalisten artean Carol Atxukarro Gonzalez hautatuz, Bartzelonan bizi den zinema makilatzaile eta ileapaintzaile saritua, eta LGTBIQ+ ikur eredugarria izanagatik.
Oraingoan, Alberto Lasa herrigintzan lan handia egindakoa bada, abesbatza arloan herriari egindako ekarpen oparoa aitortuko zaio irailaren 7an. 1991tik Parrokiko Abesbatzako zuzendaria, 1992az geroztik Txistularien Alardeko zuzendaria izan da ere. Herri Kanta Jaialdian azken urteotan Goxoki Abesbatzako zuzendaria eta aurretik Surbesta Abesbatzakoa ere.