Udazkenean itxi zen betirako Irungo Aldirietako tren geltoki historikoa, eta urtarrilaren 12 honetan hasi dira eraisten. Jose Antonio Santano, Cristina Laborda eta Iñaki Arriola garraio sailburuak hitz egin duten ekitaldiaren ondoren hasi da behargin bat hondeamakina batekin eraisketa lanetan, ordularitik hasiz.
Santanok bigarren bisita ofiziala zuen Irunera Madrilen estatu idazkari postua hartu zuenetik. Oraingoan, tren geltoki berriaren eraikuntzaz gain, Abiadura Handiko Trenaren (AHT) iritseraz eta Baiona eta Donostia arteko mugaz gaindiko aldiriko trenaren proiektuaz aritu da.
Tren geltoki berria 2026rako egonen da prest, Europar Batasuneko Next Generation funtsak jasotzeko data hori errespetatzea ezinbestekoa izanen delarik. Ordutik aurrera, azpiegitura prest izanik, AHTa Irunera iristen ahalko dela ziurtatu du Santanok. Bertze zerbait da Euskal Y-a ordurako bukatua egotea.
Puntualtasun handiagoz iristeko aukera izanen du haatik Baiona eta Donostia arteko aldiriko trenak. Akitania Berriko eskualde kontseiluak 2032ko ortzimuga finkatu bazuen, Santano estatu idazkariaren hitzetan Irungo tren geltokia prest denerako Renfek martxan jartzen ahalko du zerbitzua. Hots, 2026tik landa, frantses estatuaren baimena izanez gero, Baiona eta Donostiaren artean aldiriko tren erregularrak izanen dira, Renferen eskutik.
Hasi dira Irungo aldirietako tren geltoki historikoa eraisten.@antxetairratia pic.twitter.com/Pi1H9wlxms
— Aimar Lopez Erasun (@aimarlopezz) January 12, 2024