Igandean ospatu bazen ere, 14 konpartsek hilabete luzeetako prestakuntza lana egin dutela jakinda, larunbata honetan egingo dute otsailaren 10ean eguraldi txarrak bertan behera uztera behartutakoa. Errepika baino, indarrak bikoiztu egin dituzte eragile guztiek, inauteriak behar bezala ospatzeko. Nuria Alzaga Kulturako ordezkariak azaldu duenez, Denok Bat ostalaritza elkartea eta Bidashop merkatariena eta konpartsen ordezkariek ere euren hondar alea jarriko dute. Konpartsen desfileaz gain, Bidashop merkatari-elkarteak aukera aprobetxatu du bere proposamenak aurkezteko.
Besteak beste, mozorro-lehiaketa bat egingo dute, 11:00etan, Zabaltza plazan. Ostalaritzako DENOK BAT elkarteak irundarrei gonbita egin die mozorrotu eta Inauteriez goza dezaten. Parte hartu nahi duenak aurretik izena eman beharko du Bidashopen webgunean. Dohainik izango da izen-ematea. Eta era berean, gogorarazi dute ostalaritzako establezimenduek bi orduz luzatuko dutela ixteko ohiko ordutegia. Bestalde, 21:00etatik aurrera Los Tranquilos taldearen animazioa izango da Urdaninia plazatik hasi, San Juan, Kale Nagusia, Legia kalea eta Berrotaran kalean bukatzeko.