Aurten familiek 10 filmez gozatzeko aukera izango dute, astebururo, urritik abendura bitartean. 2022an "Zinema Haurrentzat" goiburuarekin jarri zuen Irungo Udaleko Euskara arloak ekimen hau martxan estreineko aldiz. EAJ udal taldeak udal aurrekontuen negoziazioan aurkeztutako mozio bidez onartu zuten. Eta bi urtez arrakasta bildu duen heinean, honi segida ematea erabaki du Irungo Udalak. Hartara, saio guztiak doakoak izango dira eta Ocines Mendibil zinemetan proposatuko dituzte urritik abendura. Oraingo honetan "Zinema haur eta gazteentzat" da zinema zikloaren leloa.
Jon Ugarte, Irungo Udaleko Euskararen Erabilera Sustatzeko eta Normalizatzeko Zerbitzuko ordezkariak nabarmendu duenez, «iaz zinema zikloak izan zuen arrakastaren ondoren, aurten familiek 10 filmez osatutako programaz gozatzeko aukera izango dute urritik abendura bitartean». Ugartek ekimen honen helburua «Irungo familien artean euskarazko kultur kontsumoa sustatzea» dela oroitarazi du.
Sarrerak eskuratzeko sistema
Programa martxan jarri zen urtean zailtasunak eman ziren sarreren banaketa egiteko. Batetik, film bakoitzaren proiekzioaren aurreko ostiralean jaso behar zirelako eskura Ocine Mendibilen bertan. Eta bestetik, gonbidapenak dohainik direnez, askok hauek hartu eta ez ziren gero denak erabiltzen. Banaketa sistema hobetu dutelakoan daude udal ordezkariak. Hortaz, interesa duten pertsona guztiek, asteburu horretako emanaldiei dagozkien sarrerak asteleheneko 14:00tatik ostiraleko 14:00ak arte eskuratu ahal izango dituzte www.irun.eus atarian. Eta sarrerak soberan geratuko balira, hauek lehiatilan bertan jarriko dituzte asteburuan proiekzioa hasi baino ordu erdi lehenago, 15:30etan. Izan ere, emanaldi guztiak 16:00etan izango dira.
Antolatzaileek argitu dutenez, pertsona bakoitzak gehienez ere 4 sarrera hartu ahal izango ditu, eta aipatutako arrazoiak direla eta, arduraz jokatzeko mezua eman nahi izan dute, jendeari bakarrik behar dituen sarrerak hartzeko eskatuz. «Familiei eskatzen zaie soilik erabiliko dituzten sarrerak hartzeko, eta azkenean ezin badira bertaratu, zinema-aretoetako leihatilan abisatzeko edo euskara@irun.org helbide elektronikora mezu bat bidaltzeko eskatzen diegu», argitu dute.
Jarraian, zinema zikloaren programa taula osorik. Esan bezala, saio guztiak 16:00tan hasiko dira.
|
Data |
Filma |
|
Urriak 26 |
Alan Giza Antena |
|
Urriak 27 |
Central Parkeko Heroiak |
|
Azaroak 9 |
Lagunak erreskatera |
|
Azaroak 10 |
Museoaren zaindariak |
|
Azaroak 16 |
Boo Kwai eta museoaren lapurreta |
|
Azaroak 17 |
Deep Sea. Sakontasunera bidaia |
|
Azaroak 23 |
Robotia |
|
Azaroak 24 |
Elkano. Lehen mundu bira |
|
Azaroak 30 |
Liztor kapitaina |
|
Abenduak 1 |
Barraskiloa eta balea |