Irungo kirolarien eta zaleen gaualdi handia izan zen atzokoa Ficoban. Hamaika sari banatu zituzten bertan, tokiko kirolariek eta klubek egindako balentriak aitortu nahian batzuk, eta egindako kirol ibilbidean agertutako kemena omentzeko besteak. Irundarrek otsailak 18a arte bozka zezaketen Irundarron Saria Naroa Zubimendi arraunlariak eraman du. 23 urtetik azpikoen munduko txapeldunordea da lemazain gabeko bikoan. Omenaldietan, aldiz, norbere kirolean baina zerrenda luzea izan zen atzokoa. Teresa Errandonea (atletismoa), Mario Capelete (futbola), Itziar Gomez de Arriba (kirol nutrizionista), Mayumi voley taldea, Bidasoa Atletiko Taldeko beteranoak eta Bidasoa Itzuliko antolatzaileei (Club Ciclista Irunes) iaz ospatutako 50. edizioa aintzat hartuta.
Txirrindularitzak protagonismo berezia izan du aurtengo galan. Izan ere, azken urteetan banatzen duten Txokolatezko Baloiaren saria, Juanma Garate txirrindulari irundarrak jaso du aurten. Gogoratu iaz, Bixio Gorriz futbolariari egin zioten aitortza, irundarra Donostiako Errealaren historian partida gehien (599) jokatu dituen jokalaria delako. Baina aurten txirrindularitzak eskuratu ditu ohore gehienak. Izan ere, Bidasoko Itzulia eta Juanma Garatez gain, gizonezkoetan kirolaririk onenaren saria ere Haimar Etxeberriak lortu du.
Hain justu joan den udaberrian Bidasoko Itzulian etapa irabazlea izan zen, eta profesionaletan debutatu berria da. «Saria niretzako oso berezia da, urtea ona izan da niretzat, baina banekien beste kirolari asko zegoela saria merezi zutenak», aitortu du Etxeberriak. Saria Juanma Garateren eskutik jaso du. «Nire erreferenteak omenduak izan direla ikustea berezia da, eta Club Ciclista Irunesek txirrindulari gazte asko dituela ikusi dut ere, ilusioa daukate begietan, eta ni hortik pasa nintzen, badakit zaila dela, baina txirrindularitza bultzatzeko balio dezakete sari hauek», aldarrikatu du.
2024ko emakume kirolaririk onena, aldiz, Irune Muguruza izendatu dute. BAT taldeko atletak, 23 urtetik azpikoen 400 metroko hesi lasterketako Espainiako txapelduna eta Euskadiko errekor absolutoa lortu zuen iaz. Gaztea izanagatik ere, txiki-txikitatik dabil atletismoan buru-belarri. «Marka onak egitea garrantzitsua da, baina zure hiriak horrelako aipamen bat egitea oso polita da», esan du Antxeta Irratiko mikrofonoetan, «urte asko dira entrenatzen eta azkenean joan den urtean horrek fruituak eman zituenez, oso pozik nago hori kontuan hartzea».
Bestalde, Klub Onenaren Saria Bidasoa-Irun eskubaloi taldeak jaso du. ASOBAL Ligako txapeldunordea izendatu zen iaz. Hala ere, kirola garaipenen bidetik, hau da, emaitzekin neurtzera ohituak gauden garai hauetan, Gurutz Aginagaldek, klubeko presidenteak halako aitortzak jasotzeak duen aparteko balioa azpimarratu du. «Beti etxean horrelako errekonozimenduak edukitzea polita da, badirudi beti halako sariak domina bat lortzen duenari eman behar zaizkiola, baina Bidasoak badu hori, emaitzez harago zer transmitizen duen, Bidasoa sentimendu bat da, pasio bat da, eta urtetik urtera hazten ari den proiektua dela erakusten du errekonozimendu honek», aldarrikatu du eskertuta.
Hala ere, klubean egiten den harrobi lana azpimarratu du Aginagaldek: «Momentuko emaitzak ez du etorkizuna ziurtatzen, eta gazteekin eta herri mailan sozialki egiten dugun lana da etorkizun ilusionagarri bat edukitzea».