COVID pandemia garaian Irunen sortutako "Laguntza Gutunak" proiektuaren hari beretik, hirian nahigabeko bakardadea pairatzen duten pertsonengana hurbiltzeko ekimena egin dute Plaiaundi Lanbide Heziketa Zentro Integratuko 80 ikaslek. Pandemia garaian Irungo Udaleko Adinekoen Zerbitzua eta Itziar Sistiaga idazle irundarraren eskutik, senide edo sare sozial urria duten pertsonen zerrenda identifikatu, eta elikagaiak eta laguntza eskaintzeaz gain, harreman sozial hurbilen beharra zutela ohartu ziren. Eta hainbat idazle mobilizatu ziren orduan, adineko egoitzetan ziren pertsonei edota euren etxeetan bakartuak zeudenei gutunak idazteko.
Oraingo honetan ere, Plaiaundi Institutuko 80 ikaslek hartu dute parte gutun horiek idazteko lanetan. Eta Itziar Sistiaga idazle irundarrak zuzenduta goi-mailako zikloetako gizarte, zaintza eta haur hezkuntzako ikasleek 52 eskutitz prestatu dituzte. Irungo Udaleko Gizarte Ongizate arloak 52 gutun eta horiei dagozkien audioak bidaliko dizkie adinekoei, euskaraz zein gaztelaniaz, etxeetara eta adinekoen egoitzetara ere.
Josu Iguiñiz Gizarte Ongizate arloko ordezkariak nabarmendu duenez, «gutunak bidaliz distraitu eta une horietan lagunduta senti daitezke, ikasleei esker lotura emozional sendo bat sortzen dugu gazte eta nagusien artean». Izan ere, belaunaldien arteko harremanak sustatu ditzakeen proiektua da honakoa. Eta ez da gutun bidalketa soil batera mugatuko. Aurreratu dutenez, laguntzagutunak@irun.org posta elektronikoaren bidez eska daiteke Laguntza Gutun zerbitzuan parte hartzea. Eta eskutitzak jasotzen dituztenek erantzuna bidali ahal izango dute helbide horretara ere, hala nahi izanez gero. Udalak argitu duenez, erantzun horiek gutunak idatzi dituzten pertsonei bidaliko zaizkie bueltan, harremana sustatzeko.