Ez zen gaua Real Unionek amestu bezala bukatu joan den larunbatean. Realaren harrobiaren aurkako gipuzkoar derbian, azken minutuan jasotako golaren ondorioz galdu zuten txuribeltzek 0 eta 1. Aldiz, gaualdi berezia bizi izan zuten larunbatean Stadium Galera hurbildu ziren zaleek. Klubak "Xixa" Otermin omentzea erabaki baitzuen, eta harekin batera, 2008an Espainiako Errege Kopan Real Madril kanporatu eta ondoren Real Unionek bigarren mailara igoera lortu zuten taldeko hainbat jokalari gonbidatu zituzten klubaren ikur izan den Xabier Otermin Jimenez zarauztarra omentzeko.
Klubak bizi izan dituen azken garai oparoenetako kapitaina izan zen atezaina. Tartean 2003/2004 denboraldian Gironan aritu bazen ere, 438 partida jokatu zituen txuribeltzez 2000 eta 2015 urteen artean. Eta kopan egindako balentriaz harago, 2003an Gramanetek lehenik, eta 2005ean Lorcak (talde murtziarrak orain klubaren akziodun nagusia, Unai Emery entrenatzaile zuela) ametsa zapuztu ondoren, 2009an Alcorconen kontra 3-1 irabazi ondoren bigarren mailara itzuli zireneko taldeko ikur zen atepean. Talde mitiko hartan Iñaki Goikoetxea, Juan Dominguez, Eneko Romo, Zuhaitz Gurrutxaga, Iker Gabarain, Oier Larrainzar, Iñaki Berruet, Jagoba Behobide, Paul Abasolo edo Sergio Francisco zeuden besteak beste. Azken hau, hain justu, larunbatean txuribeltzen arerioa Real Sociedad Bren egungo entrenatzailea.
Aurten, harmailetan izandako itxurarik onena eman zuten zaleek larunbatean Stadium Galen, eta "Ohorea merezi duenari" lelopean pankarta handi bat zabaldu zuen South Side taldeak harmailetan "Xixa" Oterminen omenez. Partidaren atarikoan omendu zuen klubak bere taldekide ohi ugarirekin zelia erdian elkartuta.
"Xixa" Otermin hunkituta azaldu zen. Bere hitzak ondoko audioan dituzue entzungai.