2024an 145.000 bisitari jaso ditu, 10.000ko hobekuntzarekin. 10 bisitaritik 7 antolatutako 15 azoka handiei esker erakarri dituzte, kontuan hartuta, 2023an baino hiru azoka gehiago egin dituztela. Gainerakoan, antolatutako hitzaldi, kultur ikuskizun, aurkezpen, kontzertu, azterketa publiko zein topaketa profesional ugariei esker, 320 egunez okupatuta egon da erakustazoka, eta beraz, 2023an baino 10 egun gehiagotan erabili da. Orotara, 285 ekitaldi egin dira Ficoban joan den urtean, 2023an 267 izan ziren bitartean.
Ander Sarratea, Ficobako kudeatzaileak azpimarratu duenez, diru sarrerak iazkoaren parekoak izan dira, baina erakustazokaren eragin edo inpaktu ekonomikoa ez da horretara mugatzen. «Zenbat eta azoka gehiago efektu induzidoa areagotzen da, adibidez, Bioterran Gipuzkoatik %90a kanpotik datozen 100ndik gora erakusketari biltzen dira, eta bakoitzetik hiruzpalau pertsona suposatzen du hotela, janaria, garraioa...», kontatzen du Sarrateak, eta asteburu bateko azoka batek astebeteko lana eskatzen duela dio, «agian 100 pertsona inguru ibili ohi dira lanean; montalariak, elektrikariak, iturginak, landareak, marketina... jende askok lan egiten du». Argitu dutenez, Ficobak iaz egindako fakturazio zuzena 2,3 milioi euroko izan den bitartean, bertan antolatutako azoka eta ekimenek 32,9 milioi euroko inpaktua izan dute bere inguruan, eta 215 lanpostu mantentzen lagundu dute.
2025 hasiera ezin hobea
Aurrera begira hazten jarraitzeko helburuarekin lanean ari dira ere, azoka berriak antolatuz eta sektore profesional eta eragile ezberdinen ekitaldiak erakarriz. 2003an ateak zabaldu zituenetik hona, erreferentziazko gune bilakatu da alde horretatik enpresa askoren topaketak antolatzeko. Iragarri dutenez, GUREAK bere 50. urteurrena Ficoban ospatuko du aurten, 4.000 pertsona inguru bilduko dituen ekitaldian. Bestalde, azoka berri bat aurreratu dute udazkenerako, urriaren 25ean eta 26an Antzineko Objektuen Azoka.
Hala ere, 2025ean antolatutako aurreneko ekimenak jende asko erakarri duela azpimarratu dute. Izan ere, 30.000 lagun inguru pasa dira Ficobatik urtarrilaren 30etik otsailaren 9ra ospatutako gourmet eta premium hanburgesen Burger Fest jaialditik. Bestalde, martxoaren 18an eta 19an UNIREren bigarren edizioa egingo da. Soldadurari eta lotura-teknologiei buruzko estatu mailako azoka profesionalak 80 enpresa elkartuko ditu. Eta martxoaren 28tik 30era ABABOR itsas azokaren hirugarren edizioa egingo dute, Euskadi eta Akitaniako sektoreko enpresa nagusiekin. Martxoan ere, CARAVANTUR bederatzigarren edizioa antolatuko dute. Eta gainera, maiatzaren 13tik 15era EUSKO SKILLS lanbide heziketako olinpiadak antolatzeko hautatu dute Ficoba.