«Gau historikotzat» jo du Gorka Nieto jokalariak «Artalekuk halako gauetan beti suposatzen duen bultzadak lagunduta». Julen Aginagalde zuzendari teknikoak ere, «Bidasoak bere historian bizitu izan dituen Europako gau handienetakoen pareko» goraipatu du atzo egindako balentria. Izan ere, 2025 honetan hainbat partida handi jokatu ditu Bidasoa Irunek bere gorengo maila erakutsita. Kopan Bartzelonaren aurka galdu zuen partida amaitzeko bost minutu eskas zirela markagailuan goitik zihoala. Eta joan den astean Limogen bertan, azken jokaldian eta penalti baten ondorioz galdu zuen gol bakar batengatik talde frantsesaren aurka, gehiago merezita.
Atzokoan ez zuen huts egin, eta lehen zati berdindu baten ondotik atsedenaldira 15na joan ondoren, 35-30eko markagailuarekin garaipen handia eskuratu zuen Alex Mozasen taldeak bere zaleen pozerako. Bi goleko errentarekin irabazita final laurdenetarako matematikoki sailkapena lortzeko aukera zuen Bidasoak, eta ez zuen kalkulagailurik behar izan azken mintutuetan.
Gorka Nieto harro azaldu zen partida bukatutakoan Antxeta Irratiko mikrofonoen aurrean. «Erakutsi dugu azken partidetan, eta gaur hau dela gure maila! Eta horrela jarraitu behar dugu, hau hasiera besterik ez da!» aldarrikatu du harrotasunez. Baina ez dute garaipena gozatzeko astirik ere. 2025 honetako lehen 10 partidetatik 8 etxetik kanpo jokatu behar baititu talde bidasoarrak. Eta joan den ostiralean Hueszcan aritu ondoren, orain, Plenitude ASOBAL Ligako erronkei eutsi beharko diete indarrez berriz. Heldu den larunbatean, martxoaren 1ean, Cuenca bisitatuko du talde horiak (19:00).