Maiatzaren 4ra arte bisita daiteke “Ramon Esparza, Bidasora itzultzea” erakusketa Irungo Amaia KZn. Irungo modistekin elkarlanean hasi eta Parisen 1972an Chanel frantses moda-etxearen zuzendari kreatibo izatera iritsi zen Esparzaren figura balioan jarri nahi dute. Cosmopolitan eta Vogue aldizkarietan argazkilaria eta jantzigintzan aditua den Pedro Usabiaga da komisarioa. Aipatu digunez, Cristobal Balenciaga ez da erakusketaren protagonista, baina bere ibilbidearen bidez ezagutu ahalko dugu 1923an Lesakan jaiotako Ramon Esparzaren bizitza eta obra.
Erakusketarekin batera, hiru bisita gidatu antolatu dituzte. Aurrenekoa bihar, 19:00etan. Eta besteak martxoaren 25ean, larunbata, 18:00etan, eta apirilaren 13an, 12:00etan./ irunkultura@irun.org helbidera idatzi behar da lekua erreserbatzeko. Hortaz gain, “Phantom thread” filma proiektatuko dute martxoaren 21ean Amaia KZn bertan, gaiari lotuta.