Irungo Udalak azken urteetan gabonetako kanpaina komertzial eta kulturala indartzeko erabakia hartu du. Aurten hirugarren urtez inkesta telefoniko bat egin dute 401 irundarren artean (urtarrilaren 10etik 21era), kanpainaren balorazioa egin eta datozen urteei begira zertan hobetu beharra dagoen argitzeko. Inkesta horren arabera, aurtengo "Hator, Hator Irunera!" kanpaina 10etik 8 batekin baloratu dute irundarrek. Jon Ugarte, Gobernu Irekirako eta Herritarren Arretarako ordezkariak esan duenez, «inkestaren emaitzak informazio oso baliagarria eskaintzen dio udalari zertan hobetu daitekeen jakiteko ez ezik, kanpainaren alor ezberdinen balorazio bat egiteko».
Izan ere, inkestatuek Zabaltza plazan antolatzen den Gabonetako Merkatua handitu beharra batetik, eta bestetik euskararen presentzia indartzeko nahia adierazi dute. Bien bitartean, bereziki ondo baloratu dute aurtengo apaingarri eta kaleko gabonetako argi berriak. Kasu honetan, 10etik 9 puntuko nota eman dute. Bestalde, gabonetako kanpainaren kultur agenda eta zerbitzu eskaintzari dagokionez, irundarren ohiturak ezagutzeko parada ematen du. Udalak argitu duenez, jarduera gehienak erdigunean antolatu dira, eta inkestatuen %79k erantzun du oinez hurbildu dela ekintza ezberdinetara. Era berean, 31-45 eta 45-65 urte artekoak izan dira udalak antolatutako programazioan gehien parte hartu dutenak.
Kanpainaren eragin ekonomikoa
Aurtengo kanpaina antolatzeko 700.000 euro bideratu ditu udalak. Eta udal agintariek argitu dutenez, «komertzioa suspertzeko helburua badu ere, bisitariak ekartzeaz gain, bereziki irundarrak bertan gera daitezen bilatu du kanpainak». Hau lortu ote duten eta egindako inbertsioak nolako eragin ekonomikoa izan duen neurtzeko ikerketa egin dute aurreneko aldiz. Udaleko lehenengo alkateorde eta Hiri Bultzadako ordezkari Nuria Alzagak azpimarratu duenez, «udalak egin duen ahalegin ekonomikoa ia sei bider itzuli da, kanpainak izan duen inpaktu ekonomikoaren arabera». Izan ere, gabonetan Irungo ekonomian oro har egin den 36,4 milioi euroko gastutik, 3,86 milioi euro espreski udalak abian jarritako kanpainak mugiarazi dituela ondorioztatu du egindako ikerketak.
Bestalde, kaleko elkarrizketa bidez egindako azterketa honetan argitu dutenez, gabonetako kanpainan antolatutako ekimenetan parte hartu dutenen %10 ez zen Irungoa. Nuria Alzaga kontent azaldu da, Iparralde, Nafarroa eta Donostialdeko zein Oarsoaldeko bisitariak erakartzeko gai izan delako. «Irunek beharbada ez du Donostiak hiriburua den heinean de facto dauzkan indarguneak, baina bisitariak erakartzeko erreklamu eta eskaintza propioa egiten ikasi behar dugu», argitu du.
Zentzu honetan, bisitarien %49ak kultur eta aisialdi eskaintzarengatik hurbildu zen Irungo "Hator, Hator! Irunera" kanpainara, %32,7a espreski erosketak Irunen egitera, eta %7,6k aitortu du kanpainak berak erakarrita egin duela bisita. Aldiz, irundarren %97ak uste du halako kanpaina batek «ekonomia suspertzeko traktorea» izan daitekeela.
Nolanahi ere, kanpainak izan duen zeharkako eragin edo inpaktu ekonomikoaz harago, enplegu datu zehatzak ere azpimarratu ditu udalak. Gabonetako kanpaina denboran, Irungo hirugarren sektorean 489 kontratu egin dira, iaz baino %46 gehiago. Horietatik 285 ostalaritzan eta beste 204 lanpostuak merkataritzari dagozkionak.
Aurreneko aldia da Irungo Udalak halako azterketa bat egiten duela, baina aurrerantzean udalak bultzatuko dituen ekimen handietan bideratutako diru publikoaren eragina neurtzeko halakoak egingo dituztela iragarri du Nuria Alzagak. Gabonetan bezala, Dies Oiassonis erromatar jaialdian, adibidez.