Inauterietako ajea gainetik kendu ezinik oraindik, eta gabonetako dinamizazio kanpainaren balorazioa egin berri duela, Irungo Udalak 2025eko San Pedro eta San Martzial jaietako kontzertuen kartela aurkeztu zuen atzo. Azken urteetan bezala, jaiak astebete aurreratu eta ekainaren erdiko asteburuan goi mailako kontzertuekin «motorrak berotzeko» formula errepikatuko dute aurten ere. Eta bi irizpide nagusi jarraitu ditu udalak; bertako talentu berriak eta KM0 kultura sustatzea batetik, eta bestetik euskal zein estatu mailako goi mailako musika taldeak uztartzea.
Cristina Laborda alkateak azpimarratu duenez, «kartela osatzen duten taldeak ikusita, ziur gaude Udalak Irun ekitaldien hiri bilakatzeko hartutako bidea zuzena dela». Izan ere, azken bi urteetan apustu handia egiten hasi zen udala kontzertuen kartela indartu eta Irun ekitaldi handien hiri bilakatu nahian. Iaz Izaro eta Zetak pasa ziren Urdanibia plazatik, eta 2023an ETS, Neomak eta Huntza bezalako puntako euskal musika taldeak. San Juan plazan, aldiz, eta Nuria Alzaga Kultura zinegotziak behin baino gehiagotan azpimarratu duenez, «gustu guztietarako eskaintza osatu nahian», iazko Camelaz gain, David Bustamante edo Rosario bezalakoak iragan dira ere, ikusle zifra marka guztiak apurtuz.
Aurreko edizioetako dinamikari jarraituz
Aurten ere, jaien aurreko asteburuan hasiko dira kontzertuak. Horrela, ekainaren 13an, ostiralarekin, Puro Relajo nafarrek rantxerak joko dituzte, eta, hurrengo egunean, Fangoria madrildar talde ikonikoa arituko da.
Hurrengo astean, ostiralarekin, Musika Eguna by Lotura izango da. Musikaren Egunari aurrea hartu, eta Irungo taldeek musikaren gainean duten ikuspuntua azalduko dute: arratsalde eta gauean, hainbat kontzertu izango dira Urdanibian, musika elektronikoa dutenak ildo nagusitzat, baina, edonola ere, eszenatoki bakoitzak bere nortasun propioa izango du. Egun horretan Huntza taldeko kide ohia Josune Arakistain abeslaria pasako izango da Irunen bere Süne proiektu berriarekin, aurten gogor jo duten "Lau korapilo", "Kantauri" edo "Txitxarro" bezalako kantuekin. Musikari itziartarraz gain, Zirkinik Bez taldea ere ariko da Urdanibia plazan.
Ekainaren 23an, euskal agertokiko klasiko bat jardungo da, Gatibu, birari bukaera ematen. Ekainaren 27an, Ladilla Rusa taldearen elektropop ukituko rumbak izango dira entzungai, eta 28an, Judeline 2025eko Coachellako festibalean (Kalifornia) joko duen espainiar talde bakarra izango da. Egun horretan ere, Jamaica Show orkestra Irunera itzuliko da.
Süne eta Gatiburen teloneroak
Kontzertuen eskaintza antolatzeko aipatutako irizpideen artean, KM0 kultura sustatzeko helburua du udalak. Eta alde horretatik, bertako taldeek ere kartela osatzen duten talde nagusietako batzuen aurretik telonero gisa jotzeko aukera izango dute. Aurten, Süne eta Gatiburen aurretik jotzeko proposatu du udalak, eta martxoan hasiko da horretarako izena emateko epea, ondoren, apirilean irundarrek tokiko taldeak bozketa bidez aukeratzeko.
Udalak iragarri duenez, taldeek zenbait baldintza beharko dituzte. Taldekideen %50 Irunen jaioa edo erroldatuta dagoela egiaztatu behar da, eta 60 minutuko kontzertua bermatzeko errepertorioa proposatzen ahal duela. Hortaz gain, ekainaren 21eko kontzertuan jotzeko, beste baldintza bat bete behar da: taldekideen %70k 18 eta 25 urte artekoak izan beharko dute.