Irungo Udaleko Kultura Zerbitzuak hiriko auzo elkarteekin elkarlanean 2023ko udal aurrekontu parte hartzaileetan onartutako ekimenaren baitan, auzo bizia sustatzeko kultur ekitaldiak eta animazioak proposatuko ditu udaberria hastearekin batera. Iaz 14 auzotan antolatu zituzten programa ezberdinak uztailetik abendura bitartean, eta ekimenaren balorazio baikorra egin zuten Auzo Elkarteen Federaziotik.
Aurtengo programazioa Arbesen hasiko da asteburu honetan. Auzoko plaza eta kaleetan txaranga, rock animazioa, haurrentzako jokoak eta muxikoak antolatu dituzte hilaren 28tik 30era, eta auzokideek asteburu berezi bat gozatu ahal izango dute.
Gaur bertan, 18:30etatik 20:30era Arbesko Errotatik abiatuta Los Pasai txaranga ariko da auzoa girotzen. Bihar, larunbata, martxoaren 29an haurrentzako eta familientzako Bidasoako Erraldoiak ibiliko dira 17:00etatik 18:30era Nagore Laffage plaza, Zura taberna eta inguruetan. Ondoren, 19:30etatik aurrera rock animazioa egongo da Nagore Laffage plazan eta Arbesko auzo elkartearen inguruetan ere. Igandean, aldiz, 12:00etatik 13:30era Muxikoak Jeiki taldeak dantzan parte hartzeko deialdia luzatu du Nagore Laffage parkean.