Ababor azokak haizea poparean izan du bere hirugarren edizioan

Aitor Errazkin 2025ko mar. 31a, 12:55

Hiru egunez 4.000 bisitari baino gehiago jaso ditu Ficoba erakustazokak joan den asteburuan. Bi urtean behin antolatzen den Euskadiko sektore nautikoaren azokak bilan baikorra eginez itxi zituen atzo ateak. Antolatzaileek egindako inkestaren arabera, bisitarien %81ek "pozik edo oso pozik" hartu dute azoka postuetan eta arlo dibulgatiboan proposatutako ekimenak. 

Asteburuan Ababor azokatik igaro diren 4.000tik gora bisitarien %90k baieztatu du, Ficobak 2027an antolatuko duen sektore nautikoaren laugarren ediziora itzultzeko asmoa daukatela. Orotara, 40 enpresa eta eragilek hartu dute parte azokagunean, horietatik %20 Iparraldeko edota Akitania inguruko nautika edo itsas-jarduera eta zerbitzuen alorrekoak zirela azpimarratu dute antolatzaileek. Bisitarien aldetik ere, aurreko edizioan %19a frantsesa zen bitartean, %20koa izan da oraingoan. Gainerakoan, %69 gipuzkoarra izan da, eta horietatik Bidasoaldekoez gain Donostialdekoak izan dira bisitarie gehienak, %38,65a. 

Larunbatean itsas salbamenduko helikopteroak lur hartu zuen Ficobako kanpoko aparkalekuan, Ababor azokan.

Azokan izan gara, eta Maialen Gaztañaga Ababorreko zuzendariak aipatu digunez, bisitari profil anitza izan da aurtengoan, familia ugari hurbildu baitira. Baina bereziki kirol-arrantzari lotutako zaleak nabarmendu dira. Bisitarien %75k itsasoari lotutako kirolen bat praktikatzen duela aitortu duen bitartean, %39k motor nabigazioa, %31k arrantza eta %30 bat itsasbela egiten duela aditzera eman du.

Alde horretatik, aurten aurreneko aldiz martxan jarri duten bigarren eskuko itsasontzien salmenta gunean ere. 30 itsasontzi baino gehiagoko erakusketan, kirol eta aisialdi arrantzari lotutako enbarkazioak izan baitira interes handiena piztu eta gehien saldu direnak. 

e.

Interes handia piztu du Ababor azokaren arlo diubulgatiboak, hitzaldi eta tailer ezberdinekin. 

Bestalde, Ficobako azoka gehientsuenetan bezala, alde dibulgatiboak pisu handia izan du Ababor azokan ere. Hiru egunez, itsas-ondareari eta segurtasunari lotutako hitzaldi eta tailerrak proposatu dituzte, itsas salbamenduko helikopteroaren bisita barne, baita itsas-zeharkaldi eta eskarmentu handiko hainbat abenturazaleekin solasaldiak edota liburu aurkezpenak ere.