Programa berri honen helburua, hilean behin gai edo formatu berri bat abiapuntu hartuta emakume zein gizonengan eragina duten errealitate anitzak ezagutaraztea da, eta gogoeta bultzatzea. Eta Garazi San Martinek ere «perspektiba transfeministatik ikuslea hausnarketara gonbidatzea» du helburu bere sorkuntzetan. Nafarroako Antzerki Eskolan ikasi eta gero Bartzelonan International Estudis Berty Toviasen aritu zen keinu eta mugimendu antzerkia ikasten. Clown munduan murgildu zen ere, Marcelo Katz eta Pepa Planaren eskutik. Eta azken urteetan antzerki ugaritan ibili izan da herriz herri Atikus Teatro konpainiarekin inprobisazioan De Improviso taldearekin.
Bere azken sorkuntzen artean, umore bakarrizketak ditu. Azken hilabeteetan "Bihotz, Bi hots, Bi txotx!" bakarrizketa bollero eta feminista eskaini ondoren, Irungo 'Elkarrizketa feministak' programaren barruan "Corazón porque rima con melón" ikusgarria proposatuko du. Antolakuntzatik argitu dutenez, ez da sarrerarik behar, eta Oiasso Museoko aretoa bete arte onartuko dituztez ikuslea.
Irungo Udaleko Berdintasun arlotik azpimarratu dutenez, maitasun erromantikoaren eta polimaitasunaren esparruko esperientziak eta, zehazki, LGTBIQA+ pertsonek mundu heteronormatibo batean bizi dituzten egoerak ekarriko ditu, oso abesti ezagunen bertsioen aitzakiarekin. Lehen pertsonan kontatutako istorioak kontatuko ditu, eta bakarrizketa amaitutakoan, sortzailearekin solasteko aukera izango da.