Heldu den urriaren 3tik 5era Ostomila Txotxongilo Taldeak, Irun, Hondarribia eta Hendaian Euskal Herriko Txotxongilo Topaketaren bigarren edizioa antolatuko du. Garai batean Zugarramurdin ospatu ohi zen Titiriteroen Topaketaren usadioa berreskuratu nahian, iaz Ruben Mejuto eta Zoe Tamara Cuellarrek Euskal Herriko txotxongilo konpainien aurreneko topaketa antolatu zuten Irunen eta Hondarribian. Bereziki, euskal txotxongilolaritzaren munduan emakumeek egindako ekarpena aldarrikatu zuten lehen edizioan, eta arrakasta lortu ondoren, honi jarraipena ematea erabaki dute.
Iaz hainbat auzo elkarte eta kulturgileren sustenguari esker lortu zuten antolatzea, baita autogestioa bilatu ere. Eta tokiko erakundeen babes eta laguntza ekonomiko eskasa ikusita, topaketa antolatzeko diru iturrien bila aritu dira azken aldian, Irungo jaietan txosna bat ere horretarako jarri zuten, eta Ruben Mejutok azaldu digunez, «iazko topaketan gastatutako diru bezainbeste lortu dute ekimen honi esker». Mejutok argitu duenez, txotxongilo egileak, obraren sormena eta musika ere artisau eta artisten eskutik badator ere, lan militantea da egiten dutena. «Kulturaren aldeko militantzia egiten dugu, eta gure kasuan politizatua ere bada, euskaraz eta Euskal Herrian ere txotxongiloek badutela zer esateko erakutsi nahi dugu», dio Ostomila taldeko kideak.
Girabira saioak
Urrian txotxongilo emanaldi ezberdinak proposatuko dituzte aipatutako jaialdian, baina aurretik motorrak berotuko dituzte. Izan ere, Irungo Udalak eta Txikis del Bidasoak udan hiriko parkeetan antolatzen dituzten Girabira saioen hurrengo protagonista izango da Ostomila Txotxongilo taldea ostirala honetan. Joan den abuztuaren 10ean Soroxarta parkean ekimen honen hamaikagarren edizioari ekin zioten, Klown jaialdi batekin. Eta abuztuaren 29 honetan, Alai Txoko parkean da hitzordua. Iragarri dutenez, 17:00etatik aurrera sormen tailerrak antolatu dituzte Jon Saenz del Castillo eta Aitor Espie adituekin. Eta 19:00etan Ostomila taldearen “Alaia galtzagorria” obra taularatuko dute.
Girabira saioak urrira bitartean luzatu dira. Izan ere, irailaren 27an dantza garaikidea izango da protagonista Pinudi auzuneko Anzaran parkean, eta ohikoa den bezala, Mendibil parkean itxiko dute uda honetako programazioa. Urriaren 12an izango da Girabira Txikimusika egun batekin.