Irailaren 20an, Irungo Pinudi parkean, haurrentzako marrazki lehiaketa berezia ospatuko da Euskadiko Itsasargien Lagunak Kultura Elkartearen eskutik. Goizeko 11:00etan hasiko da jarduera, eta haurrek 11:30ak arte izango dute izena emateko aukera. Antolatzaileek azaldu dutenez, lehiaketak hiru kategoria izango ditu, adin-tartearen arabera, eta parte-hartzaile guztiek opari txiki bat eramango dute etxera. Horrez gain, kategoria bakoitzeko lehenengo postuetarako sari bereziak ere prestatu dituzte. Iñaki Garciak, elkarteko kideak, adierazi du helburua haurrek sormena lantzea eta familiei aisialdi dibertigarri eta hezitzailea eskaintzea dela.