Irailaren 24ko egunsentian Irunen gertatutako eraso sexistaren aurrean, Irungo Udalak bere gaitzespenik irmoena azaldu du plazaratu berri duen Adierazpen Instituzionalean. Udal talde politiko guztiek onartutako agirian diotenez, «guztiz arbuiatu eta deitoratu nahi du eraso hori». Eta biktimari eta haren ingurukoei babesa eta gertutasuna adierazi die, eta argitu duenez, haien esku jarri ditu udalak dauzkan baliabide guztiak, biktimari arreta emateko, osatzeko eta berreskuratzeko prozesuan behar izan ditzakeenak.
Irungo Udalak azpimarratu du, gertaeraren berri izan duenetik eta erasoari buruzko informazioa berretsi, egiaztatu eta zabaldu ondoren, indarkeria sexistaren alorreko erakundeen arteko arreta eta koordinazio-protokoloa aktibatu duela. Gertakari honek erasotzaile zehatz baten ardura badu ere, indarkeria estrukturala dela oroitarazi du udalak, eta ez dela gertaera isolatu bat. Hartara, «arazo sozial honi aurre egiteko behar adina neurri sustatzen» jarraitzeko lan egiteko prest dagoela berretsi du.
Gertatutako sexu-erasoa gaitzesteko Irungo Udaleko Berdintasun Batzordeak herritar guztiei dei egiten die gaur, irailak 26an, San Juan plazan egingo den elkarretaratzera etor daitezen, arratsaldeko 19:00etan.
Erasotzailea espetxeratua
Eusko Jaurlaritzako Segurtasun Sailak argitu duenez, sexu-erasoa Irungo taberna batean gertatu zen asteazkenean, irailak 24n, goizeko ordu txikitan. Ertzaintzak 2:40 aldera gertakariaren berri jaso bezain pronto bertaratu zen, eta 28 urteko ustezko erasotzailea atxilotu zuen. Dagoeneko Martutenen espetxeratu egin dute.