Irailaren 10ean Palmera Montero gunean egindako aurrez-aurreko lehen bileran ekin zion Irungo Udalak hamaikagarren urtez antolatutako Udal Aurrekontu Parte-hartzaileen prozesuari. Guztira 1,5 milioi euroko diru partida bideratu du aurten ere horretarako. Horietatik 200.000 euro 16-30 urte artekoek proposatutako gazteen prozesura, eta beste 1,3 milioi euro 16 urtetik gorako irundar orori zuzendutako interes orokorreko proiektuak diruztatzeko.
Jon Ugartek, Gobernu Irekia eta Herritarren udal ordezkariak iazko parte-hartzea baino datu apalagoak eman direla aitortu badu ere, «parte hartu duten pertsonen kopuruak oso ona» izaten jarraitzen duela dio. Eta balioan jarri nahi izan du, aurrez-aurreko bileran parte-hartzea %40 batean emendatu egin dela. Era berean, proposamen finalistak aukeratzeko bozketan %98 igo egin da aurtengoan. Hala ere, zein proiektu gauzatuko diren erabakitzeko azken bozketan apaltze bat eman da iazkoarekin alderatuta. 2024an marka guztiak apurtu zituzten 2.564 parte-hartzailerekin, eta pertsona bakoitzak gehienez ere bost proposamen bozka ditzakeela kontuan hartuta, guztira 10.830 bozka jaso zituen udalak. Aurten, aldiz, 9.977 boto izan dira, eta 2.405 pertsonek parte hartu dute azken bozketa horretan.
Haatik, hiritarren kezka nagusien termometro gisa erabili badaiteke, aurtengo emaitzak iazko ildo bereko beharrak asebeteko ditu. Izan ere, segurtasunari lotutako proposamenak izan dira lehen hiru bozkatuenak. Horrela, zaintza-kamerak jartzea (1.011 boto), larrialdi-zerbitzuetarako materiala erostea (976 boto) eta Udaltzaingoak herritarren segurtasuna kontrolatzeko bitartekoak eta tresnak hobetzea (909 boto) izan dira herritarren boto kopuru handiena lortu dutenak. Horien ondotik, zuhaitzak zaindu, ordezkatu eta landatzea (771 boto) edo auzoetan kultura-jarduera gehiago egitea (696 boto). Hala ere, udalak partaidetza bidezko aurrekontua agortu arte proposamen bozkatuenak onartuko dituenez, 2026an diru partida honi esker gauzatuko dituzten proiektuen zerrenda luzea da. Jon Ugartek nabarmendu du, alde horretatik, aurtengo edizioa izan dela inoizko proposamenik anitzena jaso den urtea, eta beraz, «horrek esan nahi du hiria hobetzeko herritarren inplikazioa handia dela».
Jarraian, prozesu orokorretik hautatutako proposamenak:
|
Proposamena |
Boto kopurua |
Kostua |
|
Zaintza-kamerak jartzea |
1.011 |
60.000 euro |
|
Larrialdietako zerbitzuentzat materiala erostea |
976 |
35.000 euro |
|
Udaltzaingoak herritarren segurtasuna kontrolatzeko baliabideak eta tresnak hobetzea |
909 |
180.000 euro |
|
Hiriko zuhaitzak zaindu, ordeztu eta berriak landatzea |
771 |
90.000 euro |
|
Kultur jarduerak auzoetan |
696 |
89.000 euro |
|
Disuasio-aparkalekuen bideragarritasun plana |
554 |
18.000 euro |
|
Haur parkeetan ur-zurrustak jartzea beroa egiten duenerako |
551 |
20.000 euro |
|
Kultur programazioa sendotzea |
540 |
150.000 euro |
|
Kontzertuak Irunen |
518 |
150.000 euro |
|
Santiago karrikatik Santiago zubira doan bidegorria berritzea |
475 |
170.000 euro |
|
Auzo elkarteentzat karpak eta mahaiak erostea |
417 |
20.000 euro |
|
Plaiaundi kirol instalazioetako gimnasioa hobetu eta eguneratzea |
413 |
18.000 euro |
|
Molino errepideko zubian espaloiak egokitzea |
318 |
150.000 euro |
|
Tirolinen parkea |
299 |
60.000 euro |
|
Labe elektrikoa, buztinerako prentsa eta mahaiak erostea Zeramika Udal Tailerrerako. |
289 |
15.000 euro |
|
Kaleko katuen koloniak hobeto zaintzea |
278 |
15.000 euro |
|
Palmera Montero inguruan saskibaloi eta futbol zelaiak |
271 |
4.000 euro |
|
Hirian gurpildun aulkientzako plataforma baskulagarri bat duen trizikloa izatea |
259 |
15.000 euro |
|
"Irun gizalegez" kanpaina eta hautsontzidun zakarrontziak auzoetan. |
235 |
53.000 euro |
Jarraian, gazteen prozesutik hautatutako proposamenak:
|
Proposamena |
Kostua |
|
Kontzertuak, podcastak eta beste jarduera batzuk gazteentzat. |
50.000 euro |
|
Musika elektronikoaren jaialdia gazteentzat kalean. |
30.000 euro |
|
Kontzertu gehiago gazteentzat. |
20.000 euro |
|
Aisialdiko begirale ikastaroa |
18.000 euro |
|
Ikus-entzunezko materialak eta baliabideak gazte eta nerabeentzat |
18.000 euro |
|
3D tailerrak eta baliabideak gazteentzat. |
15.000 euro |
|
Kontsumo jasangarria bultzatzeko komunikazio eta sentsibilizazio kanpaina. |
15.000 euro |
|
Gamer ekitaldia |
12.000 euro |
|
Udako jarduerak gazteentzat uretako motoekin |
10.000 euro |