Irungo Udaleko Kultura Zerbitzuak jakinarazi duenez, urtarrilaren 31n, larunbatean, Kaos Etiliko eta Deklibe taldeek punk-rock kontzertua emango dute, CBAko Irun Zuzenean aretoan. Emanaldia 21:00etan hasiko da, eta sarrerak 10,25 eurotan salgai daude www.irun.org/entradas helbidean. Gogoratu dutenez, gazteek eta langabetuek 7,20 euroko prezio murriztua dute.
Kaos Etiliko taldea Esfuerzo y Gloria diskoaren bira bete-betean dabil, eta Aguraingo taldeak bere abesti gogoangarriak eta lan berriko abestiak konbinatuko dituzte Irungo kontzertu honetan.
Bestalde, Deklibe punk-rock taldeak bere ohiko protesta doinua ekarriko du. Trintxerpeko taldea inguruko errealitate sozialarekiko konpromisoa adierazten duten kantuengatik ezaguna da.