Irungo Udalak eta Irungo Emakumeen Etxeko Elkarteak (IEEE) kantu feministako tailerra antolatu dute, elkarlanaren bidez, maiatzaren 6tik abenduaren 18ra bitartean egingo dena. Guztira 25 saio izango dira, asteazken eta ostiraletan (18:30etik 20:30era), Emakumeen Etxean bertan. Parte-hartzaileak bi taldetan banatuko dira, euskaraz eta gaztelaniaz aritzeko aukera eskainiz.
Izena emateko epea apirilaren 23tik 30era egongo da zabalik, eta interesa dutenek udalaren webgunearen bidez edo Emakumeen Etxean bertan eman ahal izango dute izena. Eskaerak plazak baino gehiago badira, maiatzaren 4an zozketa publikoa egingo da goizeko 10:00etan, bertan.
Ekimen honen helburua da kantuaren bidez emakumeen ahotsa indartzea eta ikusgarri egitea, Emakumeen Etxera hurbiltzen diren zein bertako kide diren emakumeen artean. Aldi berean, espazio segurua eskaini nahi da esperientziak partekatzeko, komunitatea sendotzeko eta sare berriak sortzeko.