Hiritarren partaidetza bilatzen duen 'Alkatea auzoetan' ekimena Artia auzora heldu da gaur. Ohikoa den bezala, alkateak auzo elkarteko kideekin bisita egingo du 17:00etan. Eta auzoan identifikatuak dituzten hobekuntza beharrak bertatik bertara ezagutu ondoren, 19:00etan bizilagunekin bilera irekia egingo du auzo elkartearen egoitzan.
Irungo Udalak gogoratu duenez, azken hilabeteetan Behobian, Urdanibia-Berri (Uztarri Ona), Lapitze-Elitxu, San Migel, Arbes, Santiago, Alde Zaharra-San Juan, Anaka-Puiana, Larreaundi, Dunboa, Landetxa-Katea, El Pinar-Antzaran eta Belaskoenean eta Erdigunean egon da. Martxoan egin zuen azkeneko bisita, eta Erdiguneko auzo elkartean jasotako iradokizun guztiak aztertuta, bizilagunek poliziaren zaintza areagotzea, Colon pasealekuko baldosak konpontzen jarraitzea, eta Mendibil auzuneko argiztapena hobetzea eskatu zuten alkatearekin egindako bileran.
2024ko maiatzean berrekin zion Labordak 'Alkatea auzoetan' ekimenari, eta Irungo 17 auzoetatik pasako zela iragarri zuen orduan. Udalak gogoratu duenez, bisita hauen helburu nagusia da «herritarren ideiak, kezkak eta iritziak bertatik bertara ezagutzea». Alkateak azpimarratu du «itxuraz txikiak diren proiektuen bidez, parte hartzean oinarritutako hiri inklusibo bat eraiki» nahi duela.
Alde horretatik, hamarkada luzea darama Irungo Udala programa honekin udalgintzan «mikro-politika» bultzatu nahian. Zehazki, Jose Antonio Santano alkate zela, 2011ko abenduan egin zen aurreneko bilera Larreaundi-Olaberria auzo elkartean. Eta bilera ziklo berri hau martxan jarri arte egindako 50 bilkuretan 1.621 eskaera jasoak zituen udalak. Horietatik auzokideen eskaeren %83 konpromiso gisa aintzat hartzeaz gain, kasuen %84an aurrera eraman edo exekutatu diren proiektuak direla nabarmendu du udalak. Izan ere, alkateak dio «entzuketa aktiboa ez ezik, auzotarrei erantzutea» dela egitasmo honen helburu nagusia.
Bestalde, bilera ireki hauetara hurbiltzerik ez duten auzokideekin pentsatuz, aurreko edizioetan bezala, Irungo Udalaren webgunean proposamenak eta iradokizunak aurkezteko gune bat gaitu du udalak. Astebeteko epea izango dute Artiako bizilagunek, oraingo honetan, haien ekarpenak online egiteko.