Irungo Udalak hiriko sei hezkuntza zentrotan esku hartu du uda honetan hainbat hobekuntza egiteko. Eskola bakoitzak urtero identifikatzen dituen egin beharreko konponketa txikiak urte osoan zehar erantzuteko lanean dabiltzala nabarmendu dute gaur, Hezkuntza eta Obretako udal ordezkariek. Baina obra handiagoak eskatzen dituzten lanak egiteko udako oporraldietan eskolak hutsik daudela aprobetxatzen dute urtero.
Gorka Alvarez, Obra eta Mantentze eta Azpiegituretako zinegotziak azaldu duenez, uda honetan 451.254 euroko inbertsioa bideratu dute sei hezkuntza zentrotan hobekuntzak egiteko. Elatzeta ikastetxean Haur Hezkuntzako jolastokiaren parkea berritzen hasi dira aste honetan, ikasturte hasierarako prest egoteko asmoz. Eta udan Lehen Hezkuntzako jolastokiaren zoladura berritu egin dute.
Elatzetan, HHko jolastokia berritzen ari dira.
Bestalde, Dunboa ikastetxean Lehen Hezkuntzako beheko solairuko komunak berritu dituzte, eta Belaskoenea eskolan Haur Hezkuntzako komunetan egin dute erreforma. Toki Alai eta Txingudi Ikastolan, aldiz, Lehen Hezkuntzako hainbat aretoetan margotze lanak egin dituztela aditzera eman du Alvarezek.
Alde horretatik, udako lan handiak bukatutakoan, ikasturte hasieran ikasle, irakasle eta gurasoek aldaketa nabarmenak sumatuko dituzten arren, Irungo Udalak urte osoan zehar mantenu lanak egiten dituela azpimarratu dute, izan Haur Hezkuntza eta Lehen Hezkuntzako zentroetan, izan udalaren eskumenekoak diren Iraun Haurreskola, Udal Haurtzaindegia, helduen CEPA eskola zein Udal Musika Kontserbatorioan ere.
Sandra Caballero, Hezkuntzako udal ordezkariak udalak urtero bideratzen dituen ahaleginak balorean jarri nahi izan ditu. Izan ere, uda honetan bideratutako 451.254 euroko inbertsioaz harago, 2026 honetan guztira 2,5 milioi euroko aurrekontua zuzendu ditu udalak eskola eta hezkuntza zentroen mantenu lanetarako.
Lekaenea eskolaren egoera
Hortaz gain, Lekaenea eskolako jolastokia egokitzeko proiektua prestatzen ari direla nabarmendu dute udal ordezkariek. Izan ere, San Migel-Anaka hiritartze proiektuaren baitan, patioaren eremua handitu egin ahal izango dute. Sandra Caballerok iragarri duenez, proiektua epe luzerako denez, ikasturte hasiera honetan jolastokia erabilgarri egoteko lehentasuna ezarri dio udalak obra daraman enpresari. «Heldu den urtean patio inklusibo bat osatzeko proiektua garatu nahi dugu, eskolak aurreikusten dituen beharrak asetzeko, baina momentuz ikasturte honetan, jolastokiaren espazio eta itxitura izango dute hasteko gainerako elementurik gabe», argitu du Caballerok.
Hezkuntza ordezkariak azaldu duenez, aurreikusten duten proiektuak, aurrerantzean sortuko den auzo berriari irekita egongo den itzala eta berdeguneak izango dituen espazio bat atontzea du helburu. Hala ere, proiektua erredakzioan dago momentuz, eta jolastokiaren espazioen banaketa eta egin beharreko egokitzapenak zehaztu beharko dituzte oraindik.