Bidasoak bihar (azaroaren 17an) jasoko du Ademar Leon taldea ArtalekunBidasoak garaipenak batzen segitu nahi du eta horretarako hurrengo hitzordua bihar bertan izanen du. Ortziralarekin, azaroaren 17an, Artalekun jasoko du Ademar Leon taldea, azken aldiz gora egiten ari dena hain zuzen. 20:00etan izanen da partidua. Jacobo Cuetara entrenatzaileak argi du biharko neurketa bertze “klasiko” bat izanen dela. Bi taldeek elkarren kontra jokatzen dutenean, partidu lehiatuak izaten dituzte, entretenigarriak, eta hau ere horrela izanen dela aurreikusten dute bidasotarrek. Horrez gain, “Granollersekin batera, sasoi onenean dagoen taldea da momentu honetan”, prestatzailearen hitzetan, eta bihar kantxan “Ademarren bertsiorik onena” ikusi ahal izanen dela. Ademar “gorakadan” dagoela ere onartu du Cuetarak. Aurkari zuzena da beti, eta denboraldi honetan ere izaten ari dela ikusten da. Jokoari dagokionez, “talde borrokalaria” dela erran du entrenatzaileak, “oso lehiakorra eta indibidualki joko ona izaten duena”. Erasoan dagoenean “zaila” da bere kontra egitea azaldu duenez. Bidasoak gainera, zalantza aunitz ditu deialdian. Rodrigo Salinasek ez du biharko neurketan parte hartuko, baina badira bertze bortz zalantzak dituztenak oraindik: Matheus da Silva, Eneko Furundarena, Iñaki Cavero, Marko Jevtic eta Dariel Garcia. Gaurko arratsaldeko entrenamenduan ikusiko dute nola osatu deialdia. (Argazkia: Arrate Morales)