Sailkapeneko bigarren postuan finkatu da talde irundarra, 23 punturekin guztiraBidasoak bertze garaipen bat eskuratu zuen Artalekun, oraingo honetan Bada Huescaren kontra. 31-24ko markagailua eskuratu zuen Jacobo Cuetararen taldeak eta orain, sailkapeneko bigarren postuan finkatua dago, 23 punturekin guztira. Etxekoek indartsu hasi zuten partidua Artalekun eta segidan ireki zuten tartea markagailuan. Bederatzigarren minutuan, 9-4ko emaitza ezarri zuten, eta atsedenaldira bidean oraindik ere gehiago handitu zuten hutsunea. 19-12koarekin joan ziren bi taldeak aldageletara eta bueltan, erritmoa pixkat jeitsita, akats gehiago egin zituzten erasoan. Hala ere, Bidasoak defensa lan ona eginez, tartea mantendu zuen eta azkenik, 31-24ko emaitza jarri zuen markagailuan behin-betiko. Talde irundarrak Puerto Sagunto taldea bisitatuko du asteburuan, zehazki larunbatean (abenduaren 9an), 18:00etan. Horren ondotik, etxera bueltatuko da heldu den asteartean, abenduaren 12an, Cuenca jasotzeko (20:00). (Argazkia: Arrate Morales)