Bidasoa Irunek Plenitude ASOBAL Ligako azken jardunaldia jokatuko du, Cuencaren kontra eta matematikoki txapeldunordetza lortutaPlenitude ASOBAL Liga bere azken txanpara ailegatu da. Asteburu honetan, talde guztiek jokatuko dute ikasturte honetako azken jardunaldia, tartean Bidasoa Irunek ere. Talde horiak Cuenca bisitatuko du azken hitzordu honetan, aurreko jardunaldian matematikoki txapeldunordetza lortu ondotik. Hala ere, neurketa borrokatua jokatzera joanen dira para, baita irabazten saiatzera ere. Jacobo Cuetarak denboraldiko azken neurketaren atarikoan arduratsuak izan behar direla aitortu du: “Gure lana egin behar dugu, partidu ona egin eta bi puntuak ateratzen saiatu. Denboraldia ez da bukatu oraindik eta azken jardunaldi honetan aunitz dago jokoan. Guk txapeldunordeak izatearen ardura dugu. Jardunaldi deserosoa da, guk ez dugulako deus ere jokoan eta bertzee taldeengan eragina izan dezakegu”. Deserosoa izaten ahal bada ere, Bidasoa pozik dago dagoeneko txapeldunordea delako, eta pasa den jardunaldian lortu zuelako garaipen hori matematikoki. “Oso pozik gaude jardunaldi baten faltan txapeldunordeak garelako. Sei urteetan hiru aldiz izan gara txapeldunorde eta talde bakar batek ere ez du hori bera lortu. Denboraldia nola joan den ikusita, oso pozik gaude eta azken bi aste hauetan disfrutatzeko aukera izanen dugu”, gaineratu du entrenatzaileak. Cuenca pasa den denboraldian txapeldunorde izatetik, azken postuetan egotera pasa da. Cuetararen ustez, “hor ikus daiteke mailaren zailtasuna”. Bidasoaren asteburuko aurkariak “lana ona egin du azken urteetan”, prestatzaileak dioenez, “eta normala da tarteka gaizki ibiltzea”. Hala ere, “denboraldi honetan egindakoak ez du iluntzen pasa den ikasturtean lortutako txapeldunordetza, eta beraientzat ere salbazioagatik borrokan egotea gogorra da”. Bertzalde, egoera berak merituz betetzen du Bidasoa, beti lehen lau postuetan sailkatzea ez delako erraza. Azken jardunaldia izanen da ASOBAL Ligako taldeentzat, baita Jacobo Cuetararentzat ere Bidasoako entrenatzaile moduan. Pasa den asteburuko jardunaldiaren ondotik, eta Artalekun eman ziren agurren ondotik, “zikloa bere bukaerara ailegatzen ari dela” sentitzen du entrenatzaileak. Hala ere, azken hilabeteak, “tristeak” izanagatik ere, “oso politak” izan direla aitortu du, “zaleen gaitasuna sentitu” duelako eta taldearen emaitzak ere “ezin hobeak” izan direlako. Horregatik denagatik, “oso eskertua” dagoela azpimarratu du. (Argazkia: Arrate Morales)