Lesakako Udalak hirugarren sektorearen mahaia osatu zuen orain dela urtebete eta herriko komertzioek belaunaldi erreleboan arazo garbi bat ikusi zuten orduan. Etorkizun hurbileko arazo hori arintzeko, Emplea Fundazioarekin harremanetan jarri ziren hirugarren sektorea bera dinamizatu eta sustatzeko. Aukerak ugariak izan zitezkeela ikusirik, proiektu bat diseinatu zuten elkarrekin eta orain abiada eman diote honi. Otsailaren 13ean egin zuten lehen lan saioa, Elizondoko Lanbide Eskolako 31 ikaslerekin batera eta eurek lehen faseko komunikazio kanpainari forma eman diote. Honen ondotik, lantalde bat osatu nahi dute, komunikazio perfila duten pertsona gazteekin, eta hauek aitzinera eramanen duten hiru lan ildo prest dituzte.
Emplea Fundazioko Nerea Elosegi da proiektu honi abiada ematen ari dion horietako bat: “Hirugarren sektoreko mahaiarekin bildu ginenean, ikusi genuen proiektu polit batzuk jarri zitezkeela martxan, baina negozioetako jabeentzat lan handia zen”. Horregatik, gazteekin martxan paratzea aukera ona zela ikusi zuten, “hauek sentsibilizatzeko eta herriko komertzioen sustapenean parte hartzeko”. Lesakako hirugarren sektorearen arazo larrienetako bat belaunaldi erreleboa da eta gazteak konponbidearen partea izan daitezkeela sinesten dute denek. Horretarako, Elizondoko Lanbide Eskolako ikasleekin harremanetan jarri ziren. Itsaso Alcalde Lesakako Turismo teknikariak jakinarazi duenez, “Lanbide Eskolak inmersio modu bat egin nahi zuen Lesakan eta ekimen honetan parte hartzea aukera ona zela ikusi genuen. Gaztetasunetik eta ideia berritzaileetatik abiatuz, indarra hartuko duelako proiektuak”.
Komunikazio kanpaina berezi batekin eman diote hasiera proiektuari, otsailaren 13an egindako lehen lan saio baten ondotik. Elizondoko Lanbide Eskolako 31 ikasle bildu ziren Lesakako udaletxeko Pleno Aretoan eta “susmo kanpaina” bat abiarazi zuten. Elosegik azaldu duenez, “Cluedo jokoarekin paralelismoa eginez, Lesakan ezaguna den Zakozar pertsonaia hartu genuen eta pertsonifikatu. Zakozar galdu dela simulatu eta misterio horren barrenean ekin diogu kaptazio faseari”. Lan saioan, ikasleek eman zioten forma honi guztiari. “Herriko komertzioekin harremanetan jarri ziren, bideoak grabatu zituzten eta proiektu hau nola eta norekin egin behar zen pentsatu zuten”, Alcaldek gaineratu duenez.
Lehen pausua emanda, orain lantalde baten bila ari dira Lesakako Udala eta Emplea Fundazioa. “Komunikazioarekin zerikusia duten akzioekin lan egiteko hiru pertsona behar ditugu, komunikazio arloan jantziak egotea eta Lesakako testuinguruarekin sentsibilizatuak daudenak”, aipatu du Elosegik. Izan ere, “diseinu grafikoan eta bideogintzan” jakintzak edukitzea garrantzitsua izanen da proiekturako. Honez gain, "gaitasun biguinak” izatea ere ezinbertzekoa izanen da: “lidergotza sena edukitzea, talde lanean ongi aritzea eta erabakitzailea izatea”. Orokorrean, lantalde hau “belaunaldi erreleboaren enbaxadore izatea” nahi dute eta “konponbidearen parte izatea, zuzenean edo zeharka”.
Lantaldea osatzeko, lehenik, banaka izena eman beharko dute interesdunek, @nondagozakozahar Instagram kontuan eskuragarri dagoen esteka baten bitartez. Horretarako azken eguna otsailaren 27a izanen da, ortzeguna. Honen ondotik, biharamunean, otsailaren 28an taldea sortuko dute Lesakako Udalak eta Empleak, izena eman duten horiekin saio bat edukita. Alcaldek jakinarazi du “erronka moduko bat” planteatuko dietela partehartzaileei eta horrekin erabakiko dutela lantaldea zeinek osatuko duten.
Behin lantaldea osatuta, hirukoteak bi hilabeteko epea izanen du proiektua gauzatzeko, martxoaren 17tik maiatzaren 19ra. “Astean 10-15 orduz lan” egin beharko dutela aipatu du Turismo teknikariak, “fundazioaren mentoretza laguntza batekin”. Izan ere, Empleak 1.000 euroko ordainsaria emanen dio lantaldeko partaide bakoitzari lan hau aitzinera ateratzeko. Hirukoteak egin beharreko lana ere pentsatu dute Empleakoek, nahiz eta irekiak dauden lantaldearen proposamen eta ideia berrietara. Hain zuzen ere, bi hilabete hauetan hiru lan ildo proposatuko dizkiote lantaldeari. Batetik, sentsibilizazio kanpaina bat pentsatzea eta abiaraztea. Bertzetik, whatsapp talde baten bidez online salmenta zerbitzua bat sortzea eta azkenik, hutsik dauden lokalak dinamizatzea, panel batzuen bitartez eta negozio proposamen desberdinekin.
Lantaldea osatzeko atarian, eta proiektuaren lehen fasea abiarazita, Alcalde eta Elosegi pozik agertu dira orain arte guzti honek izan duen erantzunarekin. “Jendeak anitz galdetu du honen inguruan eta proiektuak harrera ona izan du momentuz”, azpimarratu du Alcaldek. Dagoeneko badira pertsona batzuk izena emanda, baina gehiagok ere parte hartzea espero dute, nahiz eta orain artekoarekin “balorazio hagitz positiboa” egiten duten herrian.