Beti Gazte elkarteak bortz edizioz antolatu izan du Lesakako Mendi Lasterketa, eta seigarrena prestatzen ere buru-belarri dabil azken asteotan. Heldu den igande honetan, martxoaren 9an, izanen da hitzordua goizeko 10:00etan. Elkarteko kidea den Argiñe Ordokik azaldu digu aitzineko edizioek izan duten harrerarekin «konten» daudela, eta hala, aurten gisan heldu den urteetan ere «antolatzen segitzea» dela asmoa.
Zuzendaritza kanpoko Beti Gazte elkarteko kide batzuen proposamenez hasi zen elkartea orain dela urte batzuk mendi lasterketa antolatzen. Izan ere, inguruan bazeuden gisako probak eta hori ikusita animatu ziren modalitatea Lesakara ekartzera. Beti Gazte kultur, joko eta kirol elkarte bat da eta hamaika hitzordu antolatzen ditu urtean zehar herrian. Aurpegi anitzeko elkartea da: lasterketa, futbola, soka-tira, txirrindularitza, joskintza, irakurketa taldea… eta bertze hainbat talde ditu bere baitan.
Kasu honetan, igandean izanen den proban jarri dugu arreta Argiñe Ordoki bertako kidearekin bildu garenean. Joan den edizioan 229 korrikalarik bukatu zuten proba, eta Ordokik azaldu digu aurten «hori gainditzea» dela asmoa: 300 lasterkarietan jarri dugu langa, antolakuntza eskuetatik ez joateko; «Horretara ailegatzea gustatuko litzaiguke», adierazi digu.
14 kilometroko proba izanen da igande honetan eginen dena. 900 metroko desnibela izanen du eta korrikalariak Frain eta Unanua kaskoetatik pasatuko dira. Nafarroako Federazioko lasterketen ranking-aren barnean sartzen den proba da, gainera. Antolatzaileak nabarmendu digu akaso horrek ere «indarra ematen» diola, azken urteetan bertatik zein kanpotik jende andana hurbildu baita.
Antolaketari dagokionez, kontu ugari hartzen dituzte kontuan baina Ordokik adierazi digu bolondres lan handiz antolatzen den proba bat dela Lesakako Mendi Lasterketa: «Ibilbidea prestatu, bidea garbitu, markatu, baimenak eskatu, anoaguneak prestatu eta bertan egon… hori guztia antolatzea ez da debaldekoa izaten eta bolondres lan handia egoten da».
Igandean bertan ez da izena emateko aukerarik izanen eta parte hartu nahi duenak https://www.kronoak.com/eu webgunean egin beharko du martxoaren 7a baino lehen. Bertzalde, lasterketa kanpotik ikusi nahi duenak ere herrian zein mendi-bideetan ikusteko aukera izanen du.