Urriaren 13an, igandearekin, Urruña eta Segura herrien binazkatze edo senidetze ofiziala egingo dute 12:00tan Urruñako plazan. Orain arte, bi herriak ez baitziren ofizialki senidetuak. Baina 30 urtez, Hego Lapurdi eta Gipuzkoako Goierriko bi herriak elkarri lotuak egon dira herritarren eta Iparra-Hegoa elkartearen eskutik. Iparra-Hegoa elkarteko sortzaileetako bat da Beñat Elizondo urruñarra, eta herritik eraikitako harremana ofizialtzeko garaia iritsi delako pozik azaldu da. «30 urte ezagutzen dugula elkar, Baztandarren Biltzarrean ezagutu ginen kantua eta txarangaren bitartez, Urruña-Azkain eta Segurako jende multzo bat», gogoratzen du.
Urte bereran Altsasun ospatu zen Nafarroa Oinezen ere elkartu ziren kantuan. Eta Iparra-Hegoa bizpahiru urte beranduago sortu zen. Horrela hasi ziren harremanak, eta Urruñako Berttoli elkartea eta Segurako Elorri elkartu izan ziren han ala hemen hainbatetan, eta pentsatu zuten beste zerbait egitea. Orduz geroztik, Iparra-Hegoa sortu eta urtero martxoa inguruan gai baten inguruan elkartu eta euskara oinarri hartuta, programazio kulturala antolatu dute.
Horrela, hiru hamarkada ondoren herritik eraikitako mugaz gaindiko harreman hori ofizialduko da orain. Beharrezkoa zela dio Elizondok. «Oraindik buruan diren muga madarikatu horiek ezabatu beharra dago, baina guk aspaldi gainditua dugu hori», dio Elizondok, «gu herri bakar batean bizi gara, eta horrela sentitzen dugu».
Horiek hala, igande honetan eguerditan sinatuko dute bi herrietako alkateek, Urruñako Filipe Aramendik eta Segurako Izarra Urdalletak hitzarmen ofiziala herriko plazan. Eta ondoren, poteo alai bat izango da Urruñako plazan bertan 13:00etatik aurrera. Eguna aurretik hasiko dela argitu digu Elizondok, Xaia ostatuan 10:30ean, eta binazkatze ekitaldiaren ondoren ere, Urruñako ostatu eta elkarteetan jarraituko du bestak.