Ingurumenaren aldeko erronka handienetakoa hondakinen kudeaketa bada ere, hiriguneetan gizakiok sortzen ditugun kale- hondakinen gehiengoa zigarrokinak dira. Eta arazo larria bilakatu dira. Maluruski, 100 produktu toxiko baino gehiago dituzte zigarrokinek, eta euri urek eta haizeak erraz asko bideratzen dituzte mendi, erreka, ibai, eta hortik itsasora. Urruñako herriko etxeak gai honen inguruan kontzientzia piztu eta hondakin kopuru apaltzeko xedez, ALCOME ekoerakundearekin hitzarmena izenpetu du.
Izan ere, frantses estatuan urtero kontsumitzen diren zigarroen %12 molde desegokian botatzen dira lurrera espazio publikoan, hau da, 7.000 milioi zigarreta hondar urtero. Kontratu horri esker, hiriak laguntza lortuko du bere garbiketa-jarduerak estaltzeko eta zigarroen kutsadurari aurre egiteko. Alde horretatik, lau ekintza aurreikusten dituen plan bat abian jarriko dute: hiriko sare sozialetan komunikazioa, herritarrak zigarro hondarren bilketaz sentsibilizatzeko, Bidarteko Tree6clopes elkartearekin hitzarmena zigarro hondakin horien balorizazio energetikoa bultzatzeko, kalean instalatzeko zigarroentzako hautsontzi bereziak erostea, eta garbitzaileei kaleko zigarrokinak garbitzeko prestakuntza.
Itsasoa hemen hasten da
Oroitarazi beharra dago, Recicla-Birziklatu elkarteak Bidasoaldean zigarrokinak biltzeko sentsibilizazio garbiketak auzolanean antolatzeaz gain, elkarte honek bultzatuta Irun eta Hondarribiko kaleetako estoldetan “Itsasoa hemen hasten da. Ez bota ezer” dioten plakak 2021ean ezarri zituela Txingudiko Zerbitzuak oinezko joan-etorri gehien duten kaleetan. Ekimen hau Euskal Herri osora hedatu da “Itsasoa hemen hasten da” kanpaina desberdinekin. Baina Bidasoaldean, Recicla-Birziklatu elkartearen ekimenez abian jarri zuen Txinzer-ek. Hendaian ere, antzeko ekimenak bultzatu ditu elkarte honek. Izan ere, «zigarrokinen arazoaz sentsibilizatzea izan da elkartearen helburuetan hastapen-hastapenetik», aitortu digu elkarteko Laida Rodriguezek.
Zentzu honetan, duela hiruzpalau urte dagoeneko, elkartekideek zigarrokinen bilketa bat egin zuten Irungo erdigunean, eta bildutako kopuruarekin harritu egin ziren. Hortik abiatu zuten Irungo eta Hondarribiko agintariekin Txinzer-ek gero aurrera eraman zuen aipatutako ekimena. Iaz, Surfrider Fundazioarekin elkarlanean, 100 lagun inguru bildu zituzten Irungo kaleetan auzolanean halako garbiketa bat egiteko ,ekainaren 1ean Tabakorik Gabeko Nazioarteko Egunean.