Urruñako herriko etxeak Komertzio eta Bizi Ekonomia Zerbitzua sortu du agintaldi honetan, bertako enpresa ehuna indartu nahian. Mikela Forestiaer, Enplegu Foroaren eramaileak aipatu digunez, ekonomia dinamikoa du herriak, industria polo bat badu, eta 1.000 lantegi inguruk osatzen dute gaur egun bere ekonomiaren sarea. Gehienak enpresa txikiak izanagatik ere, sakabanatuta daudela ohartu dira, Olheta edo Pausu bezalako auzoak daudenez.
Hartara, herriko enpresalarien arteko topaketa eta elkar ezagutza bultzatzeko helburua du Enplegu Foroak. Baita urruñarrei, herrian dauden lan aukerak eskaintzea ere. Apirilaren 3an egingo dute Enpleguaren Foroa. Eta lanpostu eskaintzaz gain, 10 :00etan emazteen enpresalaritzari buruzko hitzaldia emango du Andere Nahia elkarteak. Ondoren Job Dating, kontratatzen duten Urruñako enpresekin harremanetan sartzeko eta curriculuma entregatzeko aukera emango dute, Zokoako aisialdi zentroan. Martxoaren 28an itxiko dute enpresentzako bertan izena emateko epea. Aldiz, lan bilaketan ari diren herritarrek ez dute izenik eman beharko.