1980an elkartu ziren Urruña Sulzbach am Main, Babariako eskualdean Frankfurtetik 50 kilometrora dagoen herria. Urteurren borobila ospatzeko Alemaniako bidea hartuko dute hainbat Urruñarrek, hegazkin eta autobusez. Kirolen ardura duen hautetsiak baina, bizikletan eginen du bidea, bi herrien arteko harremanak sendotzeko eta senidetze honen garrantzia azpimarratzeko.
Frantzia eta Alemaniaren arteko 2.200 senidetze baino gehiago
Gaur egun, frantziar eta alemaniar estatuetako herrien artean 2.200 senidetze baino gehiago daude, Europako kopururik handiena. Hiri senidetzeak frantziar-alemaniar adiskidetasunaren oinarrian daude, eta haien historia 1950. hamarkadan hasi zen, Bigarren Mundu Gerraren ostean. Senidetze hauen helburua herrien arteko adiskidetzea sustatzea eta elkarbizitza kultura berri bat ezartzea izan da.
Hautetsi urruñarraren ustez, horrelako ekimenek herrien arteko harremanak sendotzen laguntzen dute, eta horrelako ekimenak biderkatu beharko lirateke. Urruñak iaz bigarren herri bat gehitu zion senidetzeen zerrendari : Gipuzkoako Segurarekin lotura ofizial egin zuten, ospatu berri den Iparra-Hegoa jaialdiak hiru hamarkadaz egindako lotura sendotuz.
«Beste herri bat ezagutu zuten»
Ruiz de Aldarentzat senidetze honen ideia biziki aberasgarria da, Sulzbacheko herritarrak Urruñara lehen aldiz iritsi zirenean «beste herri bat ezagutu» baitzuten, bere kultura eta ohiturekin, eta batez ere, bere hizkuntzarekin.
Ongibidean, apirilaren 15ean abiatuko da Urruñatik Mattin Rafu Ruiz de Alda, goizeko 8:30ean. Bertan, ekitaldi txiki bat antolatuko dute, irteera ofiziala markatzeko.