Joseba Aurkenerenaren Hodeiertzeko olerkiak lan berria bidaia existentzial bat da, norbanakotik kolektibora doana. Uraren irudiari helduz ibaietatik itsasora doan mugimendu jarraituari bizitzaren ibilbidea irudikatzen du idazleak, betiereko joan-etorri baten gisa. Liburuaren hasierako “Aitzin-solasa” oinarri filosofiko eta emozionala da: "jadanik egin dugun bidea luzeagoa da egiteko falta zaiguna baino".
Olerkiek, hala nola Badoa eta Bizitzaren ipar-orratza, denboraren pisua eta iraganaren presentzia dakarte. “Badoa, badoa… ezinbestean, adorez betea”, dio idazleak, bizitzaren bideari aurre egitea gorputzez eta gogo biziz eskatzen duela adieraziz. Olerki hauek ez dira etengabeko galdera filosofiko hutsalak; baizik eta belaunaldi oso baten testigantza dira, 50eko hamarkadako haurtzaro zoriontsutik etsipenera heldu den belaunaldi batena.
Aurrekari autobiografiko eta historikoak egon arren, Aurkenerenaren poesia ez da narrazio pertsonalean geratzen. Aitormendiko dorrea olerkian, euskalduntasunaren sinbolo historiko eta mitologikoak Aitor, Amagoia, Arrano Beltza gurutzatzen dira egungo kezka politiko eta sozialekin: zer utziko dugu ondorengoei?
Hodeiertzeko olerkiak liburua poesiaz betetako altxor bat da, egileak berak aitortzen duen bezala: “Nire ibilaldia dagoeneko amaitzen ari da”. Baina bere hitzek badute indar iraunkorra: belaunaldien arteko zubia eraikitzen dute, memoria kolektiboaren itsasertzean. Ez da heriotzaren beldurraz soilik ari, baizik eta ondorengoei zer mundu uzten diegunaren ardura politiko eta existentzialaz.
Loraldiberri
- Uzta berri, pizte berri
nahi zaitugu herrian,
indar berri, itxaropen berri,
gure bihotzean eta gogoan.
- Euskal liburu eta disko ugari
abenduaren 4an, herriko plazan ,
denontzat ikusgarri, bihotz altxagarri
izan dadila luzaro urruñarrengan.
- Antton Abadiaren amets eta igali,
lore jokoak, euskal bestak, hor eta han,
Euskal Herriak nahi du bizi
eta iraun orain eta geroan.
- Euskara izan dadila biziaren iturri
atzo, gaur eta etorkizunean,
horretarako Loraldiberri zaitugu lagungarri,
euskara luzaz bizi dadin gure Urruñan.
Urruñan, 2022ko abenduaren 2an