Nafarroako Gobernuak Baztango Erdizko bazkalekuan Magnesitas de Navarra enpresak egin nahi duen meategiaren proiektua UGEP (Udalez Gaindiko Eragina duen Proiektu) gisa tramitatzea baimendu du. Baztandarrek 20 urte daramatzate proiektu honen kontra borrokan eta azken urteetan gainera, hirutan saiatu dira herritarren iritzia biltzeko galdetegiak egiten. Hiruetan bertan behera gelditu dira, baimenduak izan ez direlako.
Hala ere, argia da baztandarren iritzia, izan ere, 2023ko maiatzeko udal hauteskudeetan, 10tik 8 herritarrek proiektu honen kontra agertu diren alderdien alde bozkatu baitzuten. Honez gain, Baztango Batzar Nagusiak ere eskaera berezi bat bidali zuen proiektu hau bertan behera uzteko. Edonola ere, Nafarroako Gobernuak aitzinera egin du, eskaera eta iritziak kontuan hartu gabe, eta bazkalekuan lan egiten duen Baztango 90 familien ekonomia ere kontuan hartu gabe.
Urtarrilaren 25ean egindako bilkuran gainera, Baztango Batzar Nagusiak honen harira EH Bilduk aurkeztutako mozioa onartu zuen, EH Bildu, Zurekin Baztan eta Baztango Independenteen aldeko 11 botorekin eta Geroa Bai eta UPNren kontrako birekin. Mozioan hiru puntu azpimarratzen dira:
- Nafarroako Gobernuari eskatzea Magnesitas Navarras SAk sustatutako aire zabaleko meategiaren Udalaz Gaindiko Eragineko Sektore-Proiektu izendapena deuseztatzea.
- Nafarroako Gobernuari eskatzea Baztango herri lurretan egin nahi den meategiaren inguruko galdeketa antolatzea, baztandarren iritzia jakiteko eta galdeketaren emaitza errespetatzea.
- Udalak baztandarren eta herri lurren defentsa egiteko konpromisoa hartzea behar diren ekinbideak jarraituz.
Hau guztia dela eta, Fernando Anbustegi Goñi Baztango alkatearekin izan gara solasean.