Euskal erlaitzaren higadura prozesu naturalaren arriskuaz jabetzeko "Itsasbazterra entzunez, biharkoaren zantzu bat" erakusketa antolatu dute. Eta bisitak, tailerrak eta adituen solasaldiak programatu dituzte Hendaiako Asporotsttipi interpretazio gunean apirilean zehar. Vision Littoral izeneko protokolo zientifikoa aurkeztuko dute, herritar-zientzia egiteko gonbidapena luzatuz. Abadiako ezpondaren argazkiak egin eta aplikazio batean igotzeko aukera emango dute, geologoek kostaldearen higadura prozesuaren abiadura egunez egun neurtu eta jarraipena egin dezaten.

Eguzki taldeak alegazioak aurkeztu ditu EAEko itsasertza babestu eta antolatzeko Lurralde Plan Sektorialaren hasierako onarpenaren aurka. 2025eko abenduan argitaratutako aginduaren ondoren, 45 eguneko epea baliatu dute euren iritzia emateko. Taldearen ustez, plan berriak ez du nahikoa anbizio klima-aldaketaren erronkei aurre egiteko. Itsasertzak arrisku handiak ditu, hala nola itsas mailaren igoera edo uholdeak. Hala ere, proposatutako neurriak ez direla nahikoak salatu dute, eta ardura gehiegi tokiko administrazioei uzten zaiela. Karlos Murua, eguzki talde ekologistako kidearekin hitzegingo dugu.