Akitania Berria eta Hego Euskal Herri osoa barneratzen duen mugaz gaindiko eremuaren garapenaz eta bultzada koordinatzeaz arduratzen den Euroeskualdeak, mugaz gaindiko proiektuetara bideratuko diren Europako POCTEFA 2021-2027 dirulaguntza lerroaren seigarren deialdia desblokatu berri du. Joseba Erramundegik, Euskal Hirigune Elkargoko Mugikortasuna eta Europako lankidetzarako kontseilari delegatuak azpimarratu duenez, seigarren deialdi honetan inoiz baino diru gehiago bideratuko da. Eta zehazki Euroeskualdea egituratzen jarraitzeko 3 ardatz aintzat hartuko dituzten proiektuak diruztatuko dituzte: eleaniztasuna, mugikortasuna eta enpleguan sakondu nahi baitute lankidetza.
Oraingo honetan 14,8 milioi euroko diru funtsa izango du deialdiak, eta iragarri dutenez, onartuak izango diren proiektuak 700.000 eurotik gorakoak beharko dute izan. Deialdia urriaren 23ra arte irekia izanen da, eta xehetasun guztiak www.afomef.eu eta www.poctefa.eu webgunean daude eskura.