itziar varela - bagera elkartea

«M8an kalera atera behar dugu, eskuin muturreko diskurtsoa zuritzen dutenei ozen esateko ez gaudela prest onartzeko»

Koldo Nausia 2025ko mar. 5a, 14:53

Eskuin muturraren gorakadari aurre egiteko asmoz, “Matxismoaren aurka en marche vers l'égalité” eta “Faxismorik Ez!”  lelopean, M8 Asanblada Feminista Bidasoak deitutako manifestazioa bi zutabetan abiatuko da larunbatean 17:45ean; Urruñako Pausu auzoko Charles Pucheu plazatik Hendaiakoa, eta bestea Hondarribiko Martxoak 8 plazatxotik. Irungo Zabaltza plazan elkartuko dira 19:00tan, gero San Juan plazan amaitzeko.

M8 Asanblada Feminista Bidasoak larunbatean eskualde mailako manifestaziorako deia luzatu du. 2018an egin zuten Emakumeen Eskubideen Nazioarteko Egunean aurreneko mobilizazio amankomuna. Eta orduz geroztik Hondarribia, Irun eta Hendaiako eragile feministen saretzea etengabea izan da. Iaz Irunen 2.000 lagun bildu eta gero, aurtengoa larunbatarekin izango dela probestu nahi dute indar erakustaldi bat egiteko. Bi zutabetan abiatuko da manifestazioa 17:45ean; Urruñako Pausu auzoko Charles Pucheu plazatik (Pausuko zubi ondoko komertzio gunean) bata, eta Hondarribiko Martxoak 8 plazatxotik bestea. 19:00tan Irungo manifestariekin elkartuko dira Zabaltza plazan, eta 19:30ean San Juan plazan amaituko dute, ohiko manifestu eta aldarrikapenekin. 

Aurtengoan, aldiz, “Matxismoaren aurka en marche vers l'égalité” eta “Faxismorik Ez!” lelopean egingo dute. Itziar Varela, Hendaiako Bagera elkarte feministako kide eta M8 Asanblada Feminista Bidasoa-ko partaideak aipatu digunez, «inoiz baino garrantzitsuagoa da kalera ateratzea, Europan, Euskal Herrian eta gurean ere eskuin muturreko diskurtsoak hedatzen ari direlako gero eta gehiago, eta ozen aldarrikatu behar dugu hemen gaudela, eta ez gaudela prest onartzeko gure eskubideen gaineko inoren inposaketa».

Iazko M8 manifestazioan 2.000 lagun bildu ziren Irunen, belaunaldi berriei borroka feministara batzeko deia eginez. 

Zentzu honetan, mezu homofobo eta arrazistak txuritzen dituztenei argi jakinarazi nahi diete aurten, emakumeen eskubideen kontrako erasoak ez ezik, LGTBIQ+ pertsonak, emakume arrazializatuak, erbesteratuak eta errefuxiatuak ere gogoan hartu nahi dituztela larunbateko mobilizazioan. «Sistema kolonial eta patriarkalaren zapalkuntzaren biktima guztiak gogoan ditugu, eta horregatik Avenida Zubia puntu garrantzitsua izango da», iragarri du Varelak.

Aurreratu duenez, manifestazioaren Lapurdiko ibilbidea luzea izango denez, Pausutik irten eta Hendaiako Hapetenia kalearen behealdean (18:15) eta Avenida Zubia ere, elkargune izango direla argitu dute. «Tamalez, Hendaiako herriko etxeak inauterietako desfilea egun berean antolatzea erabaki du, eta manifestazioak ezin du erdigunetik pasa, beraz, errepide nagusitik egingo dugu bide osoa», salatu du. Hala eta guztiz ere, Hendaia eta Irun arteko oinezkoen Avenida Zubia puntu garrantzitsua izango dela iragarri du, «errefuxiatu eta migratzaileekin keinu bat izango dugu bertan». 

Bagera elkartearen M8ko beste hitzorduak

Hendaiako Bagera elkarteak jakinarazi duenez, M8ko manifestaziorako pankartak eta apaingarriak prestatzeko topaketa egingo dute martxoaren 7an tren geltokiko Borderline Fabrikan 19:00etan. Bestalde, elkarteak berak beste bi hitzordu proposatu ditu datorren astean hausnartzeko. Martxoaren 12an (20:30), Hendaiako herriko etxearen laguntzarekin, "Black Box Diaries" filma proiektatuko dute Hendaiako Varietes zinema-gelan. Zine-eztabaida gisa proposatzen dute hitzordua, eta «etorkizuna haiek direnez» Aizpurdi lizeo profesionaleko ikasleak gonbidatu dituzte bertan parte hartzera.

Martxoaren 15ean, aldiz, Urruñako Itsas Mendi zineman gaualdia antolatu dute 20:00etan. Bertan "Armonias para después de la guerra" dokumentala ikusi ondoren, Neila Benbey & Gani Mirzok musikarien kontzertua izango da. Itziar Varelak argitu digunez, yezidien emazte errefuxiatu kurduekin elkartasun kontzertua izango da. La Route de la dignité delako mundu mailako itzulia egiten ari da erbestean bizi  den Gani Mirzo musikari kurdutarra. Eta dokumentalaren gai nagusiari lotuta, musikariaren fundazioak emakume kurduak laguntzen dituen musika eskola baten proiektua laguntzen du. Emanaldi honetarako sarrera libre bada ere, borondatea onartuko dute.