Euskal Herriko Pentsiodunen Mugimenduak duela bi hilabete kanpaina hasi zuenetik 95.000 sinadura bildu ditu Eusko Legebiltzarrean pentsioen osagarriaren alde aurkeztu duten Herri Ekimen Legegilea (HEL) bozkatu dezaten. Horietatik 3.500 sinadura inguru Irun-Hondarribian jaso ditu Txingudiko Pentsiodunen Plataformak. Eta oraindik ere, hasieran aurreikusitako 5.000 izenpetzeak lortzeko lanean jarraituko dute.
HEL (ILP erdaraz) edo pentsio minimoaren aldeko Herri Ekimen Legegilea bultzatzeko sinadurak jasotzeko kanpainari ekin zioten abenduaren 24an, Eusko Legebiltzarrean erregistratutako Herri Ekimen Legegilearen aldeko lanketarekin batera. Eta eskaera hau bozkatua izan dadin herritarren babes ahalik eta handiena eskuratu nahi dute, «alderdi politiko batek ere ez dezan proposamenaren aurka egin».
Gaur Irungo San Juan plazan egindako asteroko elkarretaratzean azpimarratu dutenez, «ulergaitza izango zen hainbeste babes lortu duen eta bidezkoa den eskaerari muzin egitea». Izan ere, iragarri dutenez, sinadurak aurkeztuko dituztenean, Eusko Jaurlaritzak hau bozkatu ala ez bozkatu erabakiko duen txostena egingo du. Hortaz, Eusko Jaurlaritzak egingo duen txostenera eta gai honi lotutako Gasteizko Legebiltzarren egingo den osoko bilkurara begira da Euskal Herriko Pentsiodunen Mugimendua.
Pentsiodun askoren prekaritate egoera
Xole Aguirre, Txingudiko Pentsiodunen Plataformako kideak gogoratu du Irunen 1.000 pertsona inguru daudela 650 euro inguruko pentsioa jasotzen dutenak. «Nola bizi daiteke gaur egun halako pentsio prekario batekin?», salatzen du, «badugu plazan astero biltzen den Irungo jendea ez duenak ur beroa edo berogailua jartzerik etxean». Halako egoera prekarioan bizi diren pentsiodunen gehiengoa emakumezkoa dela oroitarazten du, eta beraz, Herri Ekimen Legegile honek «pentsioetan ere dagoen arrakalarekin amaitzea» lortuko duelakoan dago.
Gogoan hartu behar baita, Herri Ekimen Legegile honi esker Pentsioen Osagarria Bermatzeko Neurriak aplikatu nahi dituztela, eta horren arabera, EAEko 100.000 pentsiodun inguruk 1.134 euro arteko osagarria jaso ahal izango luketela, hain justu, pentsio apalenak jasotzen dituzten guztiek. Halaber, emakumeek lantokietan jasaten duten diskriminazioak eta prekaritateak, langabezia-tasa handiagoak, lanaldi partzialeko kontratuen proportzio handiagoak, eta aitortu eta ordaindu ez diren zaintza-lanetan duten kokapenak pentsiorik baxuenak eskuratzea eragin dute. Gutxieneko osagarriak behar dituzten kotizaziopeko pentsioak, 500€ pasatxoko kotizazio gabeko pentsioak (%70ean jasotzen dituzte emakumeek) edo argi eta garbi nahikotasun mailara heltzen ez diren alarguntza-pentsioak ere. Bidegabekeria hori konpontzea premiazkoa bezain ezinbestekoa da plataformaren arabera, eta gutxieneko pentsio duina bermatzea da biderik zuzenena eta eraginkorrena.
Alde horretatik, gaur egungo pentsio sistema publikoaren aldeko borrokak, etorkizuneko prekaritatea saihestu dezakeela sinetsita daudenez, sinadura bilketa kanpaina hau orain arte egindako ekimenik handiena bilakatzea nahi dute. Aguirrek gogoratzen du, duela zenbait hilabete Euskal Herriko pentsionisten koordinakundearen aurreneko bileran egindako aurreikuspen guztiak apurtu dituztela dagoeneko. «Tolosan egin genuen bilera hartan 10.000 sinadura beharko genituela aipatu genuen, eta batek esan zuen 100.000 lortuko genituela, bilbainada bat zirudien, baina 95.000 jaso ditugu dagoeneko, eta ziur nago 120.000 lor ditzakegula», dio.
Bizitza duina lehenesteko politikak
Sinadura bilketa kanpaina apirilaren 14an itxiko dute, eta apirilaren 24an aurkeztuko dute Gasteizen. Beraz, oraindik ere sinatzeko aukera dagoela argitu dute. «Pentsionistak ez ezik, langile eta herritar guztiek sinatu beharko lukete, hemen oinarrizko eskubideak daudelako ezbaian», azpimarratu du Xole Aguirrek. Haien ustetan, arazoa ez baita pentsioen sistema publikoaren finantzaketa, politikarien borondatea baizik.
Gaurko kontzentrazioan Europar Batasunak egin duen gastu militarra emendatzeko deialdia salatzeko aprobetxatu du plataformak. «Pentsioak hobetzea edo babestea ezinezkoa zela zioten, baina defizitaren mugak erlaxatzeko ez dago arazorik gastu militarra 800.000 milioi eurotan handitzea aurreikusten denean», salatu dute, «ez da soilik baliabide publikoak gerraren industriara bideratzea, bizitzaren lehentasunak aldatzea baizik, Europako eliteek aspaldian laztandutako sistema sozialaren deuseztatzeko helburuekin bat datorrena».
Sinadurak Bidasoaldean eta Hegoaldeko manifestazioak
Horiek hala, Irunen astelehenetan 12:00 San Juan plazan egin ohi duten elkarretaratzean sinatu daiteke. Eta aste honetan Urdanibia plazako azokan, Sarjia parkearen sarreran topatuko duzue sinatzeko mahaia. Hortaz gain, Palmera Montero gunean pentsiodunentzako jarduerak antolatzen dituztenez, martxoaren 22an arratsaldez ere sinatu ahalko da bertan. Hondarribian, aldiz, martxoaren 19an (asteazkenean) 8:30etik 12:30era Itsas Etxeko anbulatorioan, eta martxoaren 21ean (ostiralean) 18:00etatik 20:00etara Kasino Zaharrean egongo dira sinadurak biltzen.
Sinadurak biltzeko azken txanpan sartuak daudela, apirilaren 5ean manifestazio bana deitu dute Donostian, Bilbon, Gasteizen eta Iruñean, «soldata eta pentsio duinak eskatzeko». Argitu dutenez, joan den martxoaren 13an Euskal Sindikatuen Batzordeak adierazi zuen bereak egiten dituela pentsionisten aldarriak, eta «ezinbestekotzat jotzen dute pentsionisten mugimenduarekin aliantzak sortzea». Hortaz, Hego Euskal Herriko lau hiriburuetan indar erakustaldi bat egiteko deia luzatu dute.
