Euskararen kontzientzia pizteko SALTO! udalekuak proposatzen ditu UEMAk

Antxeta Irratia 2025ko mar. 18a, 12:25

2007 eta 2010 artean jaiotako hondarribiarrek SALTO! udalekuetan parte hartu ahal izango dute, ekainaren 22tik 30era eta uztailaren 2tik 10era. UEMAko kide diren udalerrietako gazteentzako udaleku ibiltariak 2017an hasi ziren antolatzen, eta aurten guztira 120 plaza proposatzen dituzte Tolosaldean eta Goierrin herriz-herri ibiltzeko. Gure eskualdeko Bera eta Igantziko gazteek ere izango dute izena emateko aukera martxoaren 31 arte.

Irati Odriozola Zugarramurdik, UEMAko komunikazio arduradunak aipatu digunez, udaleku hauen helburu nagusia euskararen inguruko kontzientzia piztea eta gazteen arteko harremanak sortzea da. «Gazte askok euskaraz egiteko ohitura daukate, baina ohituratik modu kontzientera jauzi egiteko helburua dugu udaleku hauekin», dio UEMAko ordezkariak, eta horregatik udalekuen SALTO! izena. Alde horretatik, Euskal Herri osoko gazteak eta euskalkiak elkartu nahi dituzten heinean, eskainitako 120 plaza horiek baino eskaera handia izango balitz, UEMAK neska-mutil, adin eta jatorriaren araberako hautaketa bat egin dezake taldeak orekatuak izan daitezen.

Bestalde, antolatzaileek «parekidetasuna, aniztasuna, errespetua, naturazaletasuna eta parte hartzean oinarritutako udaleku» parekidetasuna, aniztasuna, errespetua, naturazaletasuna eta parte hartzean oinarritutako udaleku hauek ibiltariak direla oroitarazi dute. Iaz Araban antolatu zituzten, eta aurtengoan Gipuzkoan egingo dituzte.

Astebete luze Tolosaldean eta Goierrin

Zehazki, gazteek Baliarraindik Idiazabalerako bidea egingo dute, Tolosaldean hasi eta Goierrin barrena bukatuta. Bertan jolasak, abentura kirolak eta hainbat jarduera egingo dituzte taldean elkar ezagutu eta bisitatuko dituzten herriak eta jendea ezagutzeko ere. Aurreratu dutenez, kasu honetan, herri txikiak dira ibilbidean topatuko dituztenak, eta herri bakoitzak dituen azpiegituren arabera moldatuko dira gaua egiteko, frontoi estalietan izan ala udalerri bakoitzak eskaintzen dituen baldintzetara egokituz. 

Izena emateko epea martxoaren 31n itxiko dute, eta udalekuen prezioa 175 eurokoa da. Informazio guztia www.uema.eus edota 943 81 66 99 telefonora deituz jaso dezakezue. Gogoratu, gure eskualdean Hondarribiko gazteek ez ezik, UEMAko kide diren Bortzirietako Bera eta Igantziko gazteek ere izango dutela udaleku ibiltari hauetan parte hartzeko aukera. Hain zuzen ere, Hego Euskal Herriko 109 udalerrik osatzen dute UEMA, eta 350.000 bat biztanle biltzen ditu.