Euskal Herriko Pentsiodunen Mugimenduak abenduaren 24an Eusko Legebiltzarrean pentsioen osagarriaren alde erregistratutako Herri Ekimen Legegilea (HEL) bozkatu dezaten sinadura bilketaren azken txanpan sartu da. Orain artean 100.000 sinaduren langa gainditu dutelakoan daude, eta horietatik Txingudiko Pentsiodunen Plataformak 4.000 inguru jaso ditu Irunen eta Hondarribian. Azken bultzada eman nahian dabiltza, eta horretarako joan den ostiralean Xole Agirre plataformako kideak hitzaldi informatiboa eman zuen Hondarribiko Kasino Zaharrean.
Izan ere, oraindik ere hasieran aurreikusitako 5.000 izenpetzeak lortzeko lanean jarraituko dute. Alde horretatik, gaur egungo pentsio sistema publikoaren aldeko borrokak, etorkizuneko prekaritatea saihestu dezakeela sinetsita daudenez, sinadura bilketa kanpaina orain arte egindako ekimenik handiena bilakatzea nahi dute. Xole Aguirrek gogoratzen duenez, duela zenbait hilabete Euskal Herriko pentsiodunen koordinakundearen aurreneko bileran egindako aurreikuspen guztiak apurtu dituzte dagoeneko. «Tolosan egin genuen bilera hartan 10.000 sinadura beharko genituela aipatu genuen, eta batek esan zuen 100.000 lortuko genituela, bilbainada bat zirudien, baina ziur nago 120.000 lor ditzakegula», dio. Sinadura bilketa kanpaina apirilaren 14an itxiko dute ofizialki, eta apirilaren 24an aurkeztuko dute Gasteizen.
Oraindik ere sinatu ez duen ororentzat hainbat aukera emango diete datozen egunetan. Hondarribian, asteazkenean (martxoak 26) Itsas Etxeko anbulatorioan 8:30etik 12:30era arte, eta ostiralean, martxoaren 28an, Eroski supermerkatuaren atarian, 18:00etatik 20:00etara. Irunen, aldiz, Urdanibia plazako azokan, 11:00etatik 13:00era egon ohi dira larunbatero, Sarjia parkearen sarreran, baita San Juan plazan plataformak antolatzen duen elkarretaratzean astelehenero ere. Bestalde, argitu dutenez, Palmera Montero guneko 2. aretoan adinekoentzat antolatzen dituzten jardueretan ere egongo da sinatzeko parada datozen egunetan.
HEL (ILP erdaraz) edo pentsio minimoaren aldeko Herri Ekimen Legegilearen eskaera hau bozkatua izan dadin herritarren babes ahalik eta handiena eskuratu nahi dute, «alderdi politiko batek ere ez dezan proposamenaren aurka egin». Bestalde, apirilaren 5ean manifestazio bana deitu dute Donostian, Bilbon, Gasteizen eta Iruñean, «soldata eta pentsio duinak eskatzeko».
